WBC Youth World Super Featherweight champion Khawruhlian tlangval Lalrinsanga Tlau

World Boxing Council Youth Super Featherweight title chu Mizo tlangval Lalrinsanga Tlau kutah a awm ta. Khawruhlian tlangval Sangtea hian Inrinni zan khan Ghanaian boxer Eric Quarm a tukdawl a, unanimous decision (80-72, 80-72, 80-72) hmangin a hneh.

Mizo zinga professional boxer hmasa ber Sangtea hian hnehna a chan avangin dollar 500 (Rs 36,590.45) a dawng a, Mizoram sports minister Robert Romawia leh a ṭhiante hnen aṭangin cheng nuai 10 a dawng tel dawn bawk.

R. Dengṭhuama Hall-a Mizoram chhunga professional fight neih hmasak berah HC Lalramfela a rawn inlan hmasa ber a, welterweight-ah Rohit Choudhary chu hnehin Mizoram chhunga professional fight-a hnehna chang hmasa ber a ni.

Mizo boxer dang Vanlalawmpuia, F. Zoramchhana leh C. Lalhruaitluanga te pawhin an khingpuite an hneh vek a, title fight-ah Sangtea'n hnehna a chang leh bawk. Professional fight event khata Mizo inlan tamna berah Mizo boxer inlan mi panga te an chak vek. 

Mizoram boxing history-ah zan chhinchhiahtlak a ni a; Ramfela, Zotea leh Hruaia ten professional fight vawi khat an hmachhawnna a nih avangin LPS Fight Night hmasa ber hi a hlu lehzual ang.

Mizo boxer zinga talent nei ṭha ber zinga mi Sangtea hi Mizo zinga professional boxer hmasa ber ni mah se hriat a la hlawh tawk lo. Chutihrualin naupan lai aṭanga SAI-a awm tawh a nih avangin boxing chhungkuaah erawh a mikhual tawh lo.

Khawruhlian tlangval hian WBC World Youth Title a fight hma hian professional bout vawi nga hmachhawnin Digari Mahesh, G Mallikharjuna, Haidari Mchanjo leh Prince Mojesh Shrivastava te hneh tawhin a record chu 4-0 a ni a, ṭum hnihah a khingpui a knockout.

LPS Fight Night-ah Mizo mipuite hmaa hming chher tak takna hun ṭha chhawpchhuahsak a ni a, Sangtea hian a bawhpelh lo - "Round khatna aṭangin ka theihna ka pholang ang, " a tih ang chiahin a thiamzia hmuhin a awm.

Inhnek hmain Sangtea khingpui Eric Quarm-a coach Daniel Larteykwei a ṭawng pawr a, Ghana aṭanga rawn kalte hi tawnhriat an neih ṭhat zawk avangin media hmaah an chak zawkah a ngaih theih. Amaherawhchu 'ring' chhungah erawh 'lei' ni loa 'kuttum' hman a ṭul tak si avangin Sangtea a chungnung ta zawk.

Boxing legend Floyd Mayweather ngaisangtu Sangtea'n a chet dan hmangin boxing ngainatute tan hmuhnawm a rawn chhawp chhuak. Quarm-a'n Mizo tlangval hi panchilh ṭhin mah se Sangtea hian thiam takin Ghanaian boxer kuttum chu a bum a, a lo thlawnin a hnek chhuak ve lo thung.

Sangtea'n Quarm-a taksa chu a kuttum hahchawlhna atan a hmang a, Ghanaian boxer hi World Youth Title meuh fight thei a nih avangin a fei hle. Coach Sete-a sawi lawkna, "Round nganaah kan knockout ang," tih chu a takin thleng lo mah se round ngana zawhah a chak tur a chiang ti tih tawh.

Mizo boxer defensive game mawi tak chuan Quarm-a tithinrim a, Ghanaian boxer thin thawk karah Sangtea erawh a rilru a fim hle. Quarm-a'n ring sirah a nawr bet a, hnek fuh tuma a hnek ngial pawhin Mizo tlangval a hnek fuh hlei thei lo. Sangtea a tal put mawi ringawt lo a, Ghanaian boxer hi a hnek fuh chat chat.

Round riatah Sangtea a chak vek a, inhnek zawhah meuh chuan Quarm-a coach Daniel Larteykwei-a'n Mizo boxer fak mai loh chu tih theih dang a nei lo.

Mizo boxer inlante hi Sete Academy-a awm laite an ni a, boxing coach R. Lalchhuanawma (Sete-a) enkawlte an ni. Sete-a hnathawh zarah Mizo zingah boxing a nun thar phah hle.

Mizoram sports minister Robert Romawia chuan, "Mizo Boxer tam zawk an chherchhuah theih nan Mizoram sorkarin Sete Academy a ṭanpui ang," tiin inelna neih zawhah a sawi.

Robert Romawia hian C. Lalhruaitluanga hnenah lawmpuina thilpek nuai khat a pek tur thu a sawi nghal bawk. Mizo boxer dang HC Lalramfela, Vanlalawmpuia leh F. Zoramchhana te pawh an bialtu MLA  Tawnluia, Ramthanmawia leh Dr. R. Lalthangliana ten cheng nuai khat ṭheuh an pe dawn bawk.

Title fight hmachhawn tura Ghana aṭanga rawn zin Eric Quarm-a'n dollar 4500 (Rs 329314.05) a dawng a, WBC Youth Title kawltu Sangtea'n dollar 300 (Rs 21954.27) a dawng thung.

Round ruk awmna bout palia chak zawk ten Rs 30,000 an dawng a, a chak lo zawkin Rs 20,000 an dawng. Fight hmasa ber HC Lalramfela leh Rohit Choudhary te inhnek chu bout li chauh a ni a, Ramfela hian Rs 20,000 hum hawin Rohit hian Rs 10,000 a dawng ve bawk.

Title fight chhiar tel loin Super Bantamweight-ah Cherhlun tlangval F. Zoramchhana leh Kolkata boxer Mazhar Hussain te an intum tawk avangin a hmuhnawm ber a, boxer pahnih an chet ran avangin a hmuhnawm hle. Vawi hnih chak tawh Kolkata boxer Mazhar-a'n Zotea mit ko hnek kak mah se Mizo tlangval hian round tinah hnehna changin professional bout hmasa berah unanimous decision-in a chak.

Vanlalawmpuia hmachhawn tura dah Bangalore boxer Rakesh a nem mah mah a, Khuangthing tlangval rorum hian knockout a tum luatah a lo thlawna kut vai chhuah a ngah. Professional fight ni siin Rakesh-a chet dan chuan 'LPS Pro Fight' round tir lam inhnek a ang lek lek a, round lina lekah AwP-a'n hnehna a chang. Khuangthing tlangval hian professional fight vawi hnih a hmachhawnah knockout-in hnehna a chang ve ve.

Mualpui tlangval C. Lalhruaitluanga'n Congo boxer Joseph Emmangidu a hmachhawn a, Congolese boxer hian professional fight vawi thum hmachhawn tawh mah se a chet danin Mizo boxing ngainatute mit a tlung zo lo. Professional fight vawi khat hmachhawnna Hruaia'n knockout thei lo mah se round ruk inhnekah hnehna chang vekin unanimous decision-in hnehna a chang.

Chawngtlai tlangval HC Lalramfela'n inpuahchahna ṭha nei hman loin professional fight a hmachhawn a, chutichung chuan Indian boxer Rohit Choudhary lakah a chungnung hle. Round li lek an inhnek avangin Ramfela hian a knockout hman lo a, professional fight hmasa berah unanimous decision-in a chak nghal. Rohit erawh professional fight vawi thum a hmachhawnah a chak lo vek.

Co Main event tura dah Indian boxer Asad Asif Khan leh Afghanistan boxer Nawid Mohammadi te inhnek tur chu Afghan boxer-in a ṭhulh tak avangin inhnek hmuhnawm hmuh tur a awm loh phah. Professional fight vawi 12 hmachhawn tawh Asad Asif Khan hmachhawn tur hian Nabab Singh chu pawh chawp a ni a. Asad Khan-a'n a thiamna tak tak pho chhuak turin a khingpui a ṭha tawk lo a, awlsam takin round thumna a knockout.