Volleyball thiam ber Saitual District

Mizoram Volleyball Association (MVA) buatsaih Inter District Volleyball Tournament vawi 17-na chu Zirtawpni zan khelh khelh zawh niin, mipa leh hmeichhe inelna huangah Saitual District an champion ve ve - district dang chungah an leng.

Zuchhip Volleyball Court, Khawzawla inelna neihah hian Mizoram chhunga district hrang hrang 11 an inlan kim. Group paliah ṭhenhran leh niin, an inkhelh kual vek hnuah a sang pahnih zel ten quarterfinal lutin champion an zawng leh a ni.

Mipa inelna huangah champion lai Saitual chuan an title humhim turin final inkhel hmuhnawm takah Aizawl chu 25-20, 26-24, 19-25, 25-23 (3-1) a hnehin an nomawi kawl lai an humhim.

Saitual mipa team hi champion lai an nih vangin seeded pakhatna pek an ni a, hei vang hian pool match-ah team pakhat chauh an hmachhawn. An khingpui Kolasib chu 2-0 a hnehin quarterfinal an lut. Knockout chinah pawh harsatna tawk loin a thlengtu Khawzawl leh Lunglei an hneh leh a ni.

Saitual District Volleyball Association president C. Lalbuatsaiha chuan, "Hlawhtlinna kan chan theih chhan bulpui ber chu Pathianni a ni. Heng bakah hian inelna buatsaihtu MVA leh a thlengtu Khawzawl chungah lawmthu kan sawi takzet.

"Hlawhtlinna hi khaw mal maia neih theih a ni lo, district pumpui ṭanrualna rah a ni. Tun hi kan tawpna tur a ni dawn lo a, hmalam panin theihtawp kan chhuah chhunzawm zel ang," tiin Vanglaini a hrilh.

Hmeichhe inelna lamah pawh Saitual bawk an chungnung. Pool match lamah Siaha (2-0) leh Khawzawl (2-0) hneh chungin quarterfinal an lut a, pool champion niin Mamit (2-0) leh Lunglei (3-2) a hnehin final an inhlangkai.

Nomawi inchuhna inkhelah Saitual hian season hmasa semifinal-a an ngam loh Kolasib chu 25-9, 25-18, 25-11 (3-0) a hneh letin an champion. Champion lai Aizawl district chu quarterfinal paltlang zo loin an tla ve thung.

Tualchhung volleyball inelna hian ngaihhlut a hlawh a, season hmasa lama an neih theih loh Pro Volleyball chu kuminah neih ngei tum niin a boruak a lian leh hle tura ngaih a ni. PVL club tan district huap inelna hi player ṭha melhna remchang a ni nghal bawk.

#        Player                    Khua

1        PC Lalnunhlua    Saitual

2        R. Lalrindika    Ruallung

3        R. Lalhundika    Ruallung

4        Aldrin Zonunsanga    Keifang

5        Vanlalruatpuia    NE Khawdungsei

6        Lalchhanchhuaha    Ngopa

7        Zosangliana    Ruallung

8        C. Zahmingthansanga    Mualpheng

9        Lalthangliana    NE Khawdungsei

10    Vanlalruatsaka    Saitual

11    Lalnunzira    Saitual

12    C. Laltanpuia    Tualbung

#        Player            Khua

1        Lalṭhazampuii    Saichal

2        Lalhruaitluangi    Saitual

3        Biakchampuii    Saitual

4        Lalhriatzuali    Saitual

5        Lalfeli    Tualbung

6        Lalramthari    Tualbung

7        Lalrinhlui    Keifang

8        Lalawmpuii    Ngopa

9        Esther ZS Mawii    Lamzawl

10    Lalsangzeli    Phullen

11    Lalhmingmawii    Lamzawl

12    Esther Hmingthansangi    Zawngin