Mizoram an vanduai

India ram chhung cricket inelna Vijay Hazare Trophy khelh laiah Mizoram chu nimin tlai khan an vanduai. Cricket Association of Mizoram team hi chak beisei awm taka an lan hnuah Meghalaya lakah wicket hnihin an chak lo.

TI Murugappa Ground, Chennai a inelna neihah Mizoram hi ṭhum vawrah an vannei zawk a, vuak hmasak an thlang. Over 50 chhunga run 236 siamin mi paruk an in hloh - tualchhung tlangval zingah Lalchhuanliana (14 runs) leh Lalhruaizela (10) bakah Michael Lalremkima (8) ten run an siam.

Meghalaya lam vuak hun a thleng, Mizo tlangval G. Lalbiakvela chuan Wanlambok Nongkhlaw leh Larry Sangma te vawm hlumin Mizoram beiseina a siam. Mahse, Abhay Negi a che ṭha a, ani hian inkhel boruak a thlak danglam.

Hun khirh taka an awm laiin Negi-a'n ball 27 a hmachhawn aṭangin run 40 a siam thei. Luangmual tlangval Biakvela'n Negi hi vawm hlum mah se Meghalaya dinhmun a ṭha hman tawh a, wicket thum la mah se Biakvela hian Mizoram a chakpui zo ta lo a ni.

Mizoram hi plate group-ah Nagaland, Uttarakhand, Arunachal Pradesh, Meghalaya, Sikkim leh Manipur te nen an awm khawm, group match vawi nga ṭheuh an khelh kual hnuah a sang berin knock out stage an lut ang.

February 27, Inrinniah Mizoram hian Uttarankhand an hmachhawn leh dawn a, March 1 Thawhṭanni hian North East state zinga mi Assam nen an inhmachhawn zui leh dawn bawk a ni.