Bayern chakna Coman-a goal

Extra time-a Kingsley Coman goal pawimawh tauhluh hmangin Bayern Munich chuan Hertha Berlin 3-2 in an luhchhuah a, German champion hian German Cup quarterfinal an inhlangkai.

Olympiastadion Berlin-a inkhelah Bayern tan Serge Gnabry-a'n goal hnih a khung bakah Coman-a'n a khung bawk a, mualneitu lamin Maximilian Mittelstaedt leh Davie Selke te hmangin an khung thung - inkhel dangah RB Leipzig, Schalke leh Augsburg te an tlang bawk.

Hertha Berlin midfielder Arne Maier inhliam vanga in­lan­na hmun changtu Maxi­milian Mittelstad chuan minute thumna lekah Salomon Kalou hnen aṭanga a ball hmuh chu goal hmahruai atan a khung, na zeta a ball pet thlawh chu hliam vanga inlan lo Manuel Neuer aia ding Sven Ulreich tan dan hman a ni lo.

Mahse, Berlin lam lawm chhung a rei lo. Goal hmahruai luh aṭanga minute li hnu lekah Gnabry-a'n mawi zawkin a volley lut ve nghal a, Arsenal winger hlui hian chawlhlawk hmain Hertha keeper Rune Jarstein tan hna hautak siamsak leh mah se a paltlang nawn bik lo a, 1-1 in half time an hmang.

Mikhual Bayern lamin se­cond half-ah a tir phat aṭangin an nawr na nghal a, striker Robert Lewandowski leh midfielder James Rodriguez te thawhrah sengtu Gnabry bawkin Jarstein paltlangin an hmahruaina goal a khung. Chak tura ngaih an nih hnuah Bayern tlarhnung inthlahdah karah Selke chuan an si phurh rawn sut lehin hun pangngaiah 2-2 in an inhnehtawk.

Bayern hian hliam vanga hun rei tak chawl tawh Frank Ribery an luhtir hnuah an goal nawr a na sawt a, Joshua Kimmich-a corner pet chu buai nuaih karah Lewandowski chuan keeper Jarstein tlan khalhin a bin let a, defender pa­thum kara awm Coman chuan chakna goal atan a tauh lut.

Bayern Munich manager Niko Kovac chuan hnehna chang mah se tihsual an ngah tih a pha lo a, match pawimawh dang an khelh leh hmain a rang thei ang bera insiamṭhat nghal an ngaih thu a sawi chhuak.

Kum 47 mi Kovac chuan, "Holam taka tihsual a tam, insiamṭhat a hun tawh hle. Goal hnih emaw a aia tam kan chhuah zel a nih chuan kan team a inbuktawk lo hle tihna a ni, awlsam leh nuamsa zawka hnehna chang thei tur chuan tlarhnung a phui a ngai ve bawk a ni," tiin a sawi.

Bayern hian 2-1 a hma an hruai lai khan chak tlang mai thei tur niin an lang hman, mahse minute 23 chauh a awm tawh tihin defender tawnhriat ngah Mats Hummels a chesual a, goal an chhuah phah.

Germany international Hum­mels chuan, "Football-ah chuan tihsual a awm thei, kan ṭhiante tihsual vanga kan tawrh chang a awm a, kan tihsual vanga team-in a tawrh chang a awm bawk. Hertha khan min nawr na hle, mahse khatiang boruakah kha chuan tihsual a hun lo hle," tiin a tihsual a pawm.

Nilaini zan inkhel dangah RB Leipzig chuan minute kuana leka Brazilian forward Matheus Cunha goal hmangin Wolfsburg 1-0 in an hneh a, a vawi khat nan German Cup quarterfinal an inhlangkai. Schalke chuan an mikhual Fortuna Dusseldorf lak­ah 4-1 in hnehna an chang a, in­khel dangah Augsburg pawhin Hol­stein Kiel 1-0 in an hneh bawk.

Thawhlehni zan khan Ham­burg, Paderborn, Heidenheim leh Werder Bremen te chuan last 16 an lo in pet kai tawh a, Bundesliga hmahruaitu Borussia Dortmund erawh an zin kawng a tawp tawh thung.