Khabib leh McGregor kan hmu lo rei dawn

UFC chuan Conor McGregor leh Khabib Nurmagomedov chu October-a an inhmachhawn ṭuma an intihbuai avangin an hrem a, inlan thei lo tura hrem an nih bakah sum an chawitir. 

Conor McGregor hi $50,000 chawitir a ni a, thla ruk chhung atan hrem a ni bawk. Buaina chawk chhuaktu anga chhal theih Khabib Nurmagomedov hremna a na lehzual a, thla kua chhung inlan thei lo tura tih a nih bakah  $500,000 chawitir a ni bawk.

 

Khabib bik hi amah chauh hrem a ni lo a, a team zinga mi Abubakar Nurmagomedov leh Zubaira Tukhugov te chu kum khat chhung atan hrem an ni a, $25,000 chawitir an ni ve bawk a ni. 

Fighter pahnih hrem an nihna hi backdate a ni a, nikuma an inhmachhawn ṭum October aṭang khan hrem an nihna hi chhiar sak ṭan a ni. McGregor hi March hnuah chuan a inlan leh thei dawn tihna a ni. 

Kum 30 mi Khabib hi Nevada khawpuia  anti-bullying campaign-ah a in hmang a nih chuan hrem a nihna hi thla ruk atan tih hniam a ni leh ang a, McGregor ang thoin March hnuah a inlan ṭan lehnghal thei ang.

Mahse, Muslim a nih anga Ramadan (May 5 June 4, 2019) a serh dawn avangin June 5 hma chu a inlan thei chuang lo ang.

Khabib leh McGregor hi October khan UFC 229-ah an inhmachhawn a, Russian fighter Khabib hian hnehna a chan hnuah octagon aṭanga zuang chhuakin McGregor-a team a bei zui a ni. 

Conor McGregor chuan hrem an nih chungchangah hian nimin khan ṭawngkam a nei nghal a, Irish fighter chuan, "Nevada Athletic Commission-in dik taka hremna an lekkawh hi a lawmawm a, inelna hmachhawn leh thuai ka inbeisei," tiin a sawi.