Barcelona tan chak loh a thiang lo

Copa del Rey quarterfinal second leg chu zaninah khelh a ni dawn a, Barcelona-in chak ngei mamawh chungin zan dar 2:00 hian Sevilla an mikhual dawn. 

Team pahnih intawn hma­sakah chak tura rinkai zawk Barcelona chu khualmualah 0-2 in an tlawm a, Catalan club tan semifinal lut tur chuan si thum aia tlem loa chak a ngai ang. 

Zanin dar 12:00-ah Real Betis chuan Espanyol an mikhual ve dawn bawk a, team pahnih hi intawnna hmasa zawkah 1-1 in an inhnehtawk tawh - away goal nei sa Betis tan tlang turin goal chhuah loh a tawk. 

Espanyol hi Barcelona ang thoa Catalan club an ni a, Catalan club pahnihin zaninah Spanish Cup an mangṭha mai dawn em, tih zawhna chu chhanin a awm dawn. 

Copa del Rey quarterfinal first leg-ah Barcelona boss Ernesto Valverde-a'n Sevilla a zuam sual a, a player ṭha rual chawlh hahdam tirin Lionel Messi chu squad-ah pawh a awm lo. 

Mahse, Valverde rin aiin Sevilla an lo thiam a, 2-0 in Barcelona an lo tlawm! Barca coach Valverde-a'n squad-ah Messi a dah loh avangin mang­an huna koh turin Argentine forward a nei lo. 

Spanish manager hian 1-0 a nih laiin bench aṭangin Luis Suarez leh Philippe Coutinho a luhtir a, mahse danglamna thlen loin goal an chhuah belh zawkin an tlawm!

Valverde tan zaninah 'risk' lak chi a ni tawh dawn lo tih a chiang a, Messi hoin Barca-in inkhel bul an ṭan ang - Sevilla tan fimkhur a ṭul dawn tihna a ni. 

Spanish Cup tia hriat lar, Copa del Rey-ah hian season li liam taah khan Barcelona hlir an champion a, heng zinga final pahniha an hneh chu Sevilla an ni. 

Kum 2016 final-ah khan 2-0 in Sevilla hi an hneh a, season hmasa final-ah khan 5-0 in an sawp bawk - Sevilla-in an tan phuba lakna hunah an pawm ang a, Barca tan erawh thawnthu hlui hi inrintawkna petu a ni ang. 

Barca fan-ten final-ah meuh pawh 5-0 a an sawp theih hi quarterfinal-ah lehnghal, second leg-ah Nou Camp-ah 'sawp' theih an inbeisei ang tih a chiang. 

Hetihrual hian hriat tel atana ṭha erawh Sevilla hi an 'form' vanglai tak a ni. First leg-a Barcelona an hneh hnu lawkah khan La Liga-ah Levante chu 5-0 in an sawp zui a, goal khung an harsat lo tih a chiang - Nou Camp-ah goal khat lek an khung pawhin Barca tan a harsa tawh ang. 

Barcelona-in mite neih ve loh neih an nei a, chu chu Lionel Messi a ni - kum 31 mi forward hian tun season-ah match 25 khelin goal 26 a khung leh der tawh a, Nou Camp-ah Sevilla tan dan a harsa dawn. 

Hetihrual hian Messi chuan Sevilla hneha semifinal lut tur chuan an tan hna a harsa dawn tih a chiang a, fan-te chu Nou Camp-ah a tam thei ang ber pung­khawma an team pui turin a ngen.

Messi chuan, "Sevilla ang team ṭha laka 0-2 a tlawmsaa khelh chu a harsa dawn tih ka chiang. Sevilla hian player an nei ṭhain counter attack an hmang thiam em em a, fan-te puihna kan mamawh dawn a ni," a ti. 

Hriat tel atana ṭha erawh Barcelona hi Champions League last 16-a  Paris Saint-Germain laka 0-4 a an tlawm hnua 6-1 a 'comeback' thei kha an ni a, boruak san lohna zawk Copa del Rey-ah an ti thei ang tih a chiang.