Spurs-in mikhual Leipzig an ngam lo

Tottenham Hotspur tan Champions League quarterfinal lut turin hmabak a hautak ta hle - Jose Mourinho naute hian Nilaini zan khan an mikhual RB Leipzig chu 1-0 in an ngam lo. 

London khawpuia inkhelah Timo Werner chuan he inkhela goal awmchhun hi a khung a, goal hi minute 58-naah penalty aṭanga a khung a ni. 

Inhliam vanga Harry Kane leh Son Heung-min chhawr thei lotu Spurs-in an goal khung khawl pahnih tel loin beisei an phak lo a, 1-0 hi inkhel hrilhfiah nan a tling tawk lo.

 

Spurs tana player langsar ber chu goalkeeper Hugo Lloris a ni a, French si ban nghaktu hi Spurs tan ding lo se goal khat aia tam chhuah thei an ni. 

Spurs-in hun rei zawk atan Kane an chhawr thei lo tih a chianna a rei tawh a, Son an neih avangin an thla a la muang deuh - mahse Leipzig an hmachhawn hmain South Korean forward inhliam thuin a deng zui. 

Pasalṭha tel loa ral do ang chauh a ni a, Spurs tlarhma an hriam lo a, inkhelh hma hauhin chak tura rin sa an awm. First half-ah Spurs an hmuhnawm lo a, second half-ah a danglam hret. 

Second half-ah hma an sawn hret chungin Kane leh Sone awm loh theihnghilh luih a harsa a, Leipzig chu minute 90 chhunga team ṭha zawk an ni - Lloris-a'n hna a ngah takzet. 

French goalkeeper hian Werner-a khung ngei tura ngaih chu vawi hnih ngawt ṭha zetin a dang a, Angelino shot a dan per te, a let lehlam Patrik Schick-a 'shot' a dan te chu pui tak a ni. 

Spurs tan Lloris che ṭha mah se minute 90 chhunga Leipzig dang chat reng turin a tlin bik lo. Minute 58-naah Ben Davies chuan penalty area-ah Konrad Laimer-a ti tlu a, penalty a chawi. 

Kum 23 mi Werner chuan an chance ṭha neih hi goal-ah a chantir a, Lloris-a'n a dang zo lo. Hun tawp thlengin goal dang a lut tawh lo a, away-a goal khung chungin German club an haw. 

Tottenham Hotspur stadium-a inkhelah Werner a hmuhnawm a, Liverpool nena sawi zawm hlawh tak striker hian European club liante chil ti puttu a nih chhan a pholang. 

Leipzig-in 3-4-2-1 formation an hmanah Werner hian mual sir aṭangin a nawr - a tlan thei a, ball control a thiam a, a inring reng a, tun season-a goal 26 khung tawh a nih chhan a lang.

London club tan Lloris tih loha player langsara chhal ngam chu midfielder Giovani Lo Celso a ni. Season ṭan dawna Real Betis aṭanga loan hmanga hawh, January-a lak ngheh ni ta player hian freekick hmangin si phurh a sut teuh hle. 

Argentine international hian yard 25 vela hla aṭangin freekick a pet a, Leipzig keeper Peter Gulacsi chuan ṭha zeta lo dangin post a tih per - goal ngat se goal mawi bik zinga chhiar tel tlak a ni. 

Season hmasa lama Spurs-in final an luh theih nana player pawimawh Lucas Moura chuan hnai set sawt aṭangin a tauh goal lo a, Spurs vanneih zan a ni lo. 

Minute 64-naa lakchhuah Dele Alli chuan khelmual sirah a lungawi lohna a lantir a, tui bottle leh boot a paih darh nasa hle - Alli chet dan hi Spurs dinhmun hrilhfiahtu a ni a, a hmel lunghnur tak chu London club ṭantute rilru phawrh chhuaktu a ni. 

Lungngaihna tur ka nei lo. Zaninah 1-0 ni mah se, an khelmualah hnehna kan chang let thei tih ka hria. Mahse, ka player-te khelh dan zawk hian minti lunghnur takzet a ni. 

Moura, Bergwijn leh Lo Celso te khan, an vaiin eng hna mah an thawk lo. Kan talbuai takzet a ni. Zanin inkhel chauh hi ni se ka hrethiam a, mahse FA Cup leh Premier League khelh tur kan la nei bawk si a ni. 

Lamela khan minute 20 bak (bench aṭangin minute 64-naah a luhtir) a khel thei lo tih ka hria a, Ndombele tan minute 90 chu a la tam hretah ka ngai bawk. Ka neih ang angin thil siamrem ka tum a ni. 

- Jose Mourinho, 

Tottenham Hotspur 

manager 

Minute 90 kan thlir chuan chak phu zawk kan ni a, kha aia tam zawk kha goal khung thei pawh kan ni. Inkhel 

ṭantir lam minute nga chhung khan goal khung kan phu hialin ka hria. 

Player naupang zawkte hi chuan rilru hmanhmawhna nen an khel ṭhin a, mahse ka naute erawhin dawhthei takin an khel a, Spurs 

counter-attacking game dang chat tur pawh khan an thawk 

ṭha hle a ni. 

-  Julian Nagelsmann,

RB Leipzig 

coach

Inkhel Chhehvel

•    RB Leipzig kha Champions League group stage match an khelh hmasak bera chak nghal thei club parukna an ni a, a hmasa ber chu German club tho Wolfsburg niin February 2016 khan Gent an hneh. 

•    Spurs boss Jose Mourinho tan Champions League knockout game first leg mahni muala a khelha a vawi thum tlawmna chauh a ni.

•    RB Leipzig manager Julian Nagelsmann (kum 32 leh ni 211) kha Champions League knockout match-a coach ni thei naupang ber a ni a, nikum last 16-a FC Schalke hmanga Manchester City hmachhawntu Domenico Tedesco (kum 33 leh ni 161) chu a khum. 

•    Mourinho chu Champions League-a match 150 enkawl tling thei coach palina a ni a, Sir Alex Ferguson, Arsene Wenger leh Carlo Ancelotti-te huangah a awm ve ta. Italian coach Ancelotti (84) chiah hi a match hmasa 150-a hnehna 

chan tam lama a tluk loh a ni - vawi 81 

a chak.