Chanmari an harh chhuak ta

S. Malsawmtluanga kaihhruai Chanmari FC-in match thum chhung chak hmel an hmuh loh hnuah nimin tlai khan FC Venghnuai 2-1 in an hneh a, point thum hlu tak an hlawh chhuak.

Nimin tlaia Mizoram Premier Season 8 inkhelah hian Chanmari tan Lalrinchhana Tochawngin goal hmahruai a khung hnuah FC Venghnuaiin Lalhmangaiha (Tetea) hmangin siphurh sut mah se MPL club thar defender Lalruatfela'n an mahni lamah a tilut.  Rindika Hmar kaihhruai FC Venghnuai vawi khat chak lohna a ni.

Round 4 khelh zawhah Chanmari FC panganaah an awm a, a sang pali chauhin knockout stage an khelh dawn avangin insiamṭhat an mamawh. FC Venghnuai nen Chanmariin bul an ṭan ṭha a, minute 5-na lekah H. Lalmuankima corner pet chu Lalrinchhana'n a tauh goal.

FC Venghnuai an insiamrem a, midfielder Thangzawmsanga ball vawrhluh chu Tetea'n mawi zetin keeper Zothanmawia pet khum nan a hmang a, minute 13-naah 1-1 a ni. MPL club thar an chesual chhunzawm a, MK-a shot-cross chu defender Lalruatfela'n dang sualin an lamah a lut.

Minute 20 chhungin goal thum a lut a, goal dang a lut tawh lo. Chanmari goal pahniha inrawlh MK-a chu man of the match-a thlan a ni. Mama hote hian match hnuhnung pahnihah point hmuh an phu lo chungin point hnih an hlawh chhhuak a, tun ṭumah erawh phu thlapin point thum an hlawh chhuak.

FC Venghnuai coach Rindika Hmar chuan, "Goal kan chhhuah dan kha chetsual vang a nih avangin kan vanduai a tih theih a, chutihrualin team ṭha zawk an chak a ni. Kan inkhel uluk taka thlir chuan team ṭha tak nen kan inbei tawk tih a lang a, chak kan duh nachungin chak lohna phenah lawmna tur a awm," tiin a sawi.

Chanmari FC coach S. Malsawmtluanga chuan, "Theih chu ni se match tina point thum hmuh chu kan duh a, tuna hnehna kan chang leh ta hi kan lawm hle. Hnehna chang tur chuan rilru pe zawk nih a ngai a, hemi kawngah hian hma kan sawn zel a ṭul a ni," tiin chak phu zawk an nih thu a sawi.