Wolves khingpui tur Chorley

FA Cup fourth round chu zanin aṭangin khelh ṭan a ni dawn. Zanin dar 1:15 hian National League North club Chorley-in Wolverhampton Wanderers an hmachhawn ang.

Chorley hian Wolves hmachhawn tur hian Wigan Athletic, Peterborough United leh Wayne Rooney enkawl Derby County te an hneh tawh. An stadium mi 4,300 lenna Victory Park-a Premier League club an hmachhawn tur hi an club chanchina chhinchhiahtlak a tling.

English Football-ah Premier League a sang ber a, hemi zawhah hian Championship, League One, League Two leh National League a awm. Chumi zawhah chuan National League North leh National League South a awm a, National League North hi Chorley awmna chu a ni a, Wolves nen an inkarah club a tam hle.

Club pahnih intawnna hnuhnung ber chu 1986-87 season daih tawh kha a ni a, hemi ṭum hian non-league club Chorley hian fourth division club Wolves chu FA Cup first round replay-ah 3-0 in an hneh. Premier League club Wolves hian January 2013 khan non-league club Luton chu FA Cup-ah an hneh tawh lo bawk.

Chutihrualin Chorley hi FA Cup-a an thlen san ber a ni a, an tla hnai a tih theih. Wolves hi Premier League-ah beisei pha loin match hnuhnung pahnihah Everton leh West Brom hneh lo mah se Chorley hneh tur chuan an ṭha tawk.