Third division club-in Real an pet chhuak

Real Madrid an che fuh hleithei lo - Spanish football mai ni lo, European football-a club lian leh langsar hi  Copa del Rey round of 32 aṭangin petchhuah an ni. 

Knockout tournament-ah vawi khat chet sual a pawi ṭhin a, Real-in Spanish Cup last 16 an lut lo ngawr ngawr hi chu thil mak a ni hran lo - an ngam loh Alcoyano hi third division club an ni lai hi thil mak zawk chu a ni!

Hei aia mak zawk a la awm cheu. Team pahnih hi hun pangngaiah 1-1 a an inhnehtawk avangin extra time khelh a ni a, Alcoyano player Ramon Lopez chu minute 110-naah hnawhchhuah a ni - kim loin club tenau zawk an khel. 

Heti chung hian Alcoyano hian minute 115-naah Juanan hmangin chakna goal an khung a, hun a tawp meuh chuan third division club hi 2-1 in an chak a, Rel an mualpho. 

Lehkha ziak aṭanga teh tur a nih chuan Alcoyano leh Real inthlauhna a sang a, khaikhin chi pawh an ni lo. Real fans tam zawkin chak turah an inngai ang tih a chiang a, mahse, an beisei ang ngawt a ni lo. 

Alcoyano squad pumpui hlut zawng hi euro maktaduai hnih chuang awrha ngaih a ni a, Real Madrid player-te hlutna nen khaikhin chi a ni lo - Eden Hazard-a man zat ringawt pawh pound maktaduai 150-a tling tlat!

Mahse, lehkha leh khelmual a inang lo. Real tan defender Eder Militao chuan minute 45-naah goal hmahruai khung mah se Spanish club hlim chhung a rei lo a, minute 90-naah Alcoyano tan defender Jose Solbes chuan si phurh a rawn sut.

Defender pahnihin goal an khung a, hun tawp thlenga goal dang a luh tawh loh avangin extra time khelh zui a ni. 

Minute 110-na a ni a, Spanish third division club an talbuai - an player Ramon Lopez chu a vawi hnih nana yellow card a hmuh avangin hnawhchhuah a ni a, Real tan chakna kawngkhar a inhawng. 

Mahse, Real beisei angin thil a kal lo. Player 10 ni chunga khel Alcoyano zawkin goal an khung a, Juanan chuan third division club tan hian a rawn khung. 

Alcoyano-in goal an khungin minute nga chiah a awm tawh a, Real an tho leh tawh lo. Hun a tawp zui a, rin loh zawk team-in hnehna an chang. 

Real boss Zinedine Zidane chuan, "Coach ka ni a, mawhphurtu chu keimah ka ni," tiin dem tur ber a nih thu a sawi a, kum 2001 hnua third division club-in Copa del Rey aṭanga Real an petchhuah vawi ngana a ni bawk. 

Zidane-a'n an chak loh chhanah huaisen takin mawhphurhna a la a, chhuanlam a zawng lo - player a rem dan enin chhuanlam zawng thei pawh a ni chiahin a lang lo hrim hrim. 

Real hian Copa del Rey hmaa an match-ah Athletic Bilbao chu ngam loin Spanish Super Cup an lo mangṭha tawh bawk a, Bilbao ngam lo team aṭangin Zidane-a'n player pakua ngawt a thlak danglam. 

French coach hian khelhna hmun chang tam lo player-te khelhtir ve bawk mah se Karim Benzema, Eden Hazard, Marcelo, Casemiro leh Toni Kroos-te chu khelmualah luhtir an ni a, chhuanlam tur a vang hle. 

Zidane chuan, "Hnehna chang lo zawk nih chu engtiklai mahin a nuam ngai lo. Tlawm zawk nih ka duh lo a, ka player-te pawhin an duh bik lo. Third division club kan hmachhawn avangin hnehna chang tur kan ni a, mahse, kan tlawm miau si. Zanin thil thleng hi chu player career-a thleng ve ṭhin reng a ni a, ni duhawm lo tak ni mah se atthlak taka khawsak kan tum chuang lo. Kan tih dik loh kan en ang a, theihtawp kan chhuah zui ang," a ti. 

Spanish Super Cup aṭanga petchhuah a nih hnu lawkah Copa del Rey an mangṭha a, an ngam loh team hi third division club an nih bawk si avangin Zidane-a dinhmun chu a him lo leh ta niin Spanish media-te chuan an tarlang. 

Tomas Roncero, Spanish chanchinbu lar AS-a editor-in-chief chuan, "Madrid chuan an club chanchina thawnthu chhuanawm loh ber pawl an ziak kai ta a ni. Kum 2021 hi tawp tawh mai rawh se. 

"Tun hi hun duhawm lo tak a ni a, Zidane-a pangparte pawh kumkhua atan an chuai ta," tiin a ziak a, French coach hi a insiamṭhat leh a ring tawh lo!

Spanish chanchinbu lar Marca chuan, "Zidane hi coach a nih chhunzawm zel chuan thil mak a ni ang," tiin an ziak - Real hi La Liga-ah pahnihna an ni mek bawk a, an chung chiaha awm Atletico Madrid chu match hniha khel tam zawk chungin point liin an phak lo mek.