Villarreal chak zo lo

Season thara Champions League khelh tum Villarreal-in an league match hnuhnung berah hnehna an chang zo lo a, an mikhual Granada chu 2-2 in an inhnehtawkpui. 

Granada hian khualmualah goal an khung hmasa zawk hial - tawnhriat nei ṭha leh Villarreal striker hlui Roberto Soldado chuan minute 21-naah goal hmahruai a khung a, mahse, Granada hian minute riat hnu lawkah Ruben Pena hmangin an chhanglet. 

Unai Emery enkawl Villarreal-in minute 65-naah penalty hmangin hma an hruai zui a, Moi Gomez chuan penalty aṭangin an goal hnihna a khung. Mahse, Granada-in season tharah European football khelh ve ngei an la tum reng tih pholangin goal an khung ve leh a, Kenedy chuan minute 75-naah si phurh hi a sut. 

Inkhel tawp lamah boruak a sang hle - Granada  midfielder Yan Eteki chu Villarreal winger Yeremi Pino lakah a foul a, referee chuan he thil thleng hi a hmu lawk lo. 

Mahse, khelmual sir lama VAR hmanga a ennawn hnuah penalty spot-a kawk - Eteki-a'n referee thutlukna a dodal nasa hret a, red card a hmu zui bawk. Hetihlai hian minute 90-a ni tawh. 

Mahse, bench aṭanga luhtir  Paco Alcacer chuan a team-te lawmna turin an penalty hmuh hi goal-ah a chantir thei lo a, goalkeeper Rui Silva chuan ṭha zetin a dansak - team pahnihin point an insem a, a tawpa lawm zawk chu chak lo thei dinhmuna ding hman Granada an ni.