Man City-in Aston Villa an hneh hram

Premier League champion tura rinkai Manchester City-in harsa takin Aston Villa 2-0 in an hneh a, Etihad Stadium-a goal hnih hi hun tawp hnaih lama lut ve ve a ni. Pep Guardiola hoten tun season-a a vawi khat nan pakhatna dinhmun an luah a, amaherawhchu Manchester United-in Fulham an hneh zui avangin a chung bera an awm chhung erawh a rei lo.

Man City tan minute 79-naah Bernardo Silva-a'n mawi zetin a pet goal a, amaherawhchu goal luh theih nan hian offside position-a awm Rodri chuan Villa defender Tyrone Mings a chhuhsak avangin sawisel a hlawh hle. Minute 90-naah Ilkay Gundogan-a'n penalty aṭangin chak nemnghehna goal a khung.

Aston Villa-in kum thar nia Manchester United an hmachhawn hnuah an first team an inlan leh chauh a, Covid-19 vangin Dean Smith-a hote hi an buai. Coronavirus vangin training-na hmun an khar a, FA Cup-a Liverpool hmachhawn tur pawhin an youth team an tir.

Villa hi an player pakua leh backroom staff panga ten Covid-19 an kai nia sawi a ni a, Pathianni khan training ground an hawng leh chauh. Hri leng avang hian Everton leh Tottenham te nena an inkhel tur chu an sawn tawh a, Man City nen pawh duh thala inbuatsaih ṭha an nei thei lo.

Amaherawhchu December thla khan Villa hian match ngaah hneh loh an tawng lo a, Premier League-ah pawh pangana niin kum tawp an khar. Villa boss Dean Smith chu manager of the month-ah thlan a ni a, dah hniam theih an ni lo.

Ṭan phat aṭangin Man City goal bawh a na nghal. Minute lina lekah hnai tak aṭanga Silva pet chu keeper Emiliano Martinez-a'n a dang a, hemi per hi Raheem Sterling-a'n goal-ah pet nghal mah se defender Matty Cash-a'n a dang hman leh bawk.

Villa-in tlarhnung an rem phui ṭha a, chutihrualin Man City-in goal hmahruai an khung hmain goal attempt vawi 24 zet an nei tih erawh hriat a ṭha. Pep-a hote an beidawng duh lo a, minute 79-naah goal an sual chhuak.

Offside position-a awm Rodri-a'n hnung lam aṭangin Villa defender Mings a va chuh hneh a, City midfielder hian Silva pe lehin Portuguese midfielder hian ṭha zetin a pet goal. Dean Smith tan lungawina chi a ni lo a, referee Jon Moss bulah a thinurna a lantir rei hret avangin hnawhchhuah a ni.

Villa pawhin Bertrand Traore hmangin goal khung theihna an nei a, Douglas Luiz pawhin box pawn aṭangin ṭum hnih ṭhat zetin pet mah se keeper Ederson-a'n a dansak vek.

Hun tawpah erawh goal chance ngah zawk Man City an vannei a, Gabriel Jesus-a'n defender Matty Cash kut a tauh per zarah penalty an hlawh chhuak. Gundogan-a'n penalty hi goal-ah a chantir a, tun season-a inelna hrang hranga goal sarihna a khungna chiah a ni.

Aston Villa manager Dean Smith chuan, "Goal khatna an khung dan kha thutlukna holam tak a ni. Khatiang thutlukna kha ka la hmu ngai lo. Stadium-a awm zawng zawng khan goal-ah an ngai lo ang. Goal hnihna an khung theihna chhan pawh kha handball a ni lo," tiin a lungawi loh thu a sawi chhuak a, a naute khelh danah erawh a lawm thung.

Manchester City manager Pep Guardiola chuan, "Team ṭha tak lakah ṭha takin kan khel chhuak a ni. Villa hi an hlauhawm em em a, an result aṭangin engkim a chiang. Chuvangin point thum kan hlawh chhuak hi a lawmawm hle," tiin a lawm thu a sawi a, an goal hmahruai khung dan erawh a hmuh chian loh avangin sawi zui theih an neih loh thu a sawi thung.

Club ṭhenkhatin match 19 te an khelh tawh laiin Aston Villa erawhin vawi 16 chauh an la khel. FA Cup aṭanga tla tawh Villa hian Inrinni zan dar 1:30-ah Newcastle United an mikhual dawn. He inkhel hi November thlaa khelh tawh tur a ni a, Covid-19 vanga sawn a ni.

Manchester City-in Inrinni zan dar 11:00-ah League Two club Cheltenham an hmachhawn dawn a, January 26, Thawhlehni zanah Sam Allardyce-a enkawl West Brom nen Premier League-ah an inkhel lehnghal ang.