Man United hmahruaina Pogba goal mawi

Manchester United-in Paul Pogba goal ropui hmangin Burnley 1-0 in an hneh a, Premier League hmahruaitu an ni. Hemi hnu hian Ole Gunnar Solskjaer hote hi Liverpool nen goal awm loin an inhnehtawk zui a, Nilaini zana Fulham an hmachhawn meuh chuan pathumnaah an awm. 

Craven Cottage-ah Paul Pobga bawkin goal mawi bik a khung a, Manchester United-in Fulham 2-1 a an hneh zarah Manchester City leh Leicester City lehpelin Premier League chhip lerah an awm leh ta. Tunkar tawpah league match a awm dawn lo a, Pathianni zan dar 10:30 hian FA Cup fourth round-ah Man United-in an hmelma Liverpool an mikhual ang.

Norwegian manager Ole Gunnar Solskjaer-a'n Liverpool hmachhawn tute aṭangin player pathum a thlak. Victor Lindelof, Scott McTominay leh Marcus Rashford te aiah Eric Bailly, Mason Greenwood leh Edinson Cavani te an lut a, player luh dan thlirin chak an tum tih a lang a, FA Cup an thlir tel bawk.

Captain Harry Maguire kawppui tura Bailly luh chhan hi defender Lindelof-a'n a hnungzângah harsatna a tawh vang a ni a, Rashford erawh Liverpool hmachhawn turin a hahdamtir niin a lang. Rawlthar duhawm Greenwood-a'n hun ṭha a neih phah a, Uruguayan striker Cavani erawh goal bawh a nat theih nana lut a ni.

Midfield-ah Fred leh Pogba te an inkawp a, tlarhnung puitu zingah ball pass thiam French midfielder Pogba a awm tel hi number 10 position-a khel Bruno Fernandes tan malsawmna a tih theih. Brazilian midfielder leh McTominay te a inkawp ṭumin Fernandes a hlauhawm tawk ṭhin lo.

Fulham-in inkhel bul an ṭan ṭha a, Ivan Cavaleiro-a'n keeper David de Gea tan hna a siamsak. Hetah hian an duh tawk lo, minute nganaah Zambo Anguissa ball vawrhluh um luttu Lookman-a'n United offside trap bumin goal hmahruai a khung.

Man United hian tun season inkhelh ṭantirh minute nga chhungin vawi li ngawt goal an chhuah tawh a, inchhuanna tur chi a ni lo. Amaherawhchu Solskjaer hote hi goal an chhuah hnuah an tho chhuak leh ṭhin a, Fulham lakah pawh hian an talbuai phah lo.

United-in harhtharna an chan theihna tura player pawimawh Bruno Fernandes-a'n box pawn aṭangin goal ban a pet per a, hemi hnu lawk hian Portuguese midfielder cross chu keeper Alphonse Areola-a'n thlauh palhin Cavani-a'n minute 21-naah awlsam takin siphurh sutna goal a khung.

Kum 33 mi Cavani-a'n player naupang zawk Anthony Martial leh Marcus Rashford te tan zir tur a hnutchhiah a, goal ropui leh goal naran hlutna a inan reng avangin goal awlsam khung turin awmna hmuh dik pawimawhna a pholang.

United captain Maguire leh Martial ten an lu hmangin goal an khung thei lo a, player ṭha bik Pogba mamawh hun takah a rawn pen chhuak. Minute 65-naah Pogba hian box pawn aṭangin a ke vei lamin a pet kual lut a, keeper Areola dem theih a ni ta lo.

Cavani-a'n minute khat hnuah Fernandes-a ball vawrhluh chu goal zawnah tauh mah se keeper Areola-a'n a dansak. PSG keeper hlui hian Fulham beiseina a siam a, hun tawp lamah United an talbuai phah hle.

Chelsea aṭanga loan hmanga Fulham zawmtu Ruben Loftus-Cheek-a'n keeper chiah a hmachhawn hnuah a pet goal thei lo a, David de Gea-a'n a dang ṭha ve bawk. Kum 24 mi Loftus-Cheek hian Luke Shaw-a clear ṭha tawk loh chu a pet over leh bawk a, injury time-ah Aleksandar Mitrovic ball tauhin defender Bailly per hnuah goal pawnah chiah a kal.

Manchester United manager Ole Gunnar Solskjaer chuan, "Paul Pogba a inpeih ta hle. A fitness a ṭha a, midfield lai leh sirah a khel thei a, hei tak hi a danglamna a ni. Yellow card a hmu hma nachungin goal venhim kawngah a che ṭha a, a khel ṭha em em a ni," tiin goal khungtu a fak.

Norwegian manager Solskjaer chuan sawi chhunzawmin, "Goal kan chhuah hnu khan kan passing a ṭha sawt a, ball kan inpe kual ṭha a, mual sir kan hmang ṭha a, tun aia goal tam zawk khung thei tur kan ni. 

"Edinson-a goal kha centre forward goal khung dan tur a ni a, tlarhmaa a chet dan a hmun a nuam ṭhin hle. Hetiang player thlan tur ka nei hi ka vannei a ni," tiin a sawi.

- Man United-in tun season match sariha goal an chhuah hmasak hnuin hnehna an chang. An tluk loh chu Newcastle 2001-02 season (10) leh Man Utd tho 2012-13 season (9) te an ni.

- Man United-in khualmuala Premier League match 17 (W13 D4) an khelhah hneh loh an tawng tawh lo a, December 1998 leh September 1999 chhunga an record siam tawh chu an nih rual.

- Edinson Cavani chu Man United player zinga goal hmasa pali khualmuala khung vek awmchhun a ni.

- Bruno Fernandes-a'n February 2020-a Man United tana bul a ṭan hnuah tun ṭum hi assist emaw goal emaw nei loa league match thum a zawna hun a hman hmasak ber a ni.