Midang tan Djokovic a ṭawng chhuak

Australian Open khel tura player zin lut an enkawl danah lungawi lo an tam a, world number 1 Novak Djokovic chuan khunghran hun chhung ti tawi tur leh kalphung hran siam turin inelna thuneitu lam a ngen.

Melbourne khawpui an thlen hnuah, hri leng kaihhnawih vangin player 72 ngawt chu mahni thlenna hotel room chhuahsan lo tura tih an ni. Mahni room chhunga insawizawi leh tennis ball vua hmuh tur an awm nual.

Player ṭhenkhat erawhin training an nei thei a, tournament hi February 8 aṭanga khelh tur a nih tawh avangin training neih theih a pawimawh hle. Player ṭhenkhat chuan an ṭhat dan berin an khel chhuak thei dawn lo tih a chiang.

Mipa singles champion lai Djokovic chuan, "Khunghran hun chhung hi ni 14 aia tih tawi theih ni se, a nih loh pawhin room chhuahsan lo tura tihte hi an awmna hmun sawnsak theih ni se. Tennis court awmna inah awm thei se ka duhpui hle," tiin a sawi.

Australian Open chief Craig Tiley chuan, "Hei chu thurawn mai a ni a, phutna thil a ni lo," tiin Djokovic thusawi chu an tan tih theih a nih loh thu a sawi nghal a, khunghran hun chhung tih tawi an tum lem lo.

Serbian tlangval a ngawi mai mai duh bik lo. Djokovic chuan, "Ka player puite tana ka ṭhahnemngaihna thil chu a ngaihthlak dan an thiam lo deuh a ni, kan zavaia ṭhatna tur nia ka ngaih kha ka sawi mai a ni.

"Kei chuan training ka nei thei reng a, harsatna a awm lo. Mahse midang rilru hrehawm leh chep taka awmte nen ang khata awm theih kha ṭha ka ti a ni," a ti a, tournament hotupa Craig nen an inkarah boruak ṭha lo a awm lo tih a sawi tel bawk.

Season khat chhunga Grand Slam khelh hmasak berah hian Djokovic hi vawi riat a champion tawh a, ani aia record nei ṭha an awm lo. Kuminah pawh hliam nei loa a khel tluan a nih chuan champion tura rinkai ber a ni leh ang.

Inelnaah hian season hmasa lama inlan tam lo, hmeichhe world number 1 Ashleigh Barty pawh a inlan dawn. Tournament ṭan hma hian player langsar ṭhenkhat chuan exhibition match khelh tur an nei bik dawn a ni.