Cavs lakah Nets chak lo
James Harden, Kevin Durant leh Kyrie Irving te awmna Brooklyn Nets chu an boruak lian viau mah se, Cleveland Cavaliers nen 'overtime' vawi hnih ngawt an khelh hnuah 147-135 in an chak lo.
Nimin zing NBA inkelah Nets tan player ṭha pathum - Harden, Durant leh Irving te chu minute 48 chhung an inlan rual a, fourth quarter bikah phei chuan an pathum hian point 28 ngawt an hlawh chhuak.
Mahse, Cavaliers tan Collin Sexton-a'n point 42 ngawt neiin NBA huangah match khata point a hmuh tam pahnihna a tawng. A point neih zingah hian overtime hmasa zawk a zawh dawn second 1.2 chauh a awm laia 3-points a neih chu a pawimawh bera chhal ngam a ni.
Nets tan Durant-a'n point 38 neiin a thawhhlawk viau, mahse overtime zawh dawnah chakna basket a neih tum chu a hlah. Hun tawp hma minute hnih chauh awm tawhah point ngaa an sanfalna an hum theih loh avangin an tlawm.
NBA regular season kal laiah Nets hi vawi sarih an chak lohna chiah niin, ṭum kua an chak tawh thung; Eastern Conference-ah pangana an ni mek. Hnehna changtu Cavs hi Nets hnuai chiahah an awm.
Inkhel dangah Eastern Conference hmahruaitu Philadelphia 76ers chuan Boston Celtics 117-109 in an hneh. 76ers tan hian centre Joel Embiid-a'n point 42 a neih bakah rebound vawi 10 a la, point 22 neitu Tobias Harris a thawhhlawk bawk.
Los Angeles Clippers chuan an elpui Lakers chak loh karah hnehna an chang. Clippers hian an khingpui Sacramento Kings chu 115-96 a hnehin Western Conference hmahruaitu an ni.
NBA Results
Cleveland Cavaliers 147 - 135 Brooklyn Nets
Atlanta Hawks 123 - 115 Detroit Pistons (OT)
Philadelphia 76ers 117 - 109 Boston Celtics
Dallas Mavericks 124 - 112 Indiana Pacers
Miami Heat 111 - 102 Toronto Raptors
Orlando Magic 97 - 96 Minnesota Timberwolves
Golden State Warriors 121 - 99 San Antonio Spurs
Los Angeles Clippers 115 - 96 Sacramento Kings
Phoenix Suns 109 - 103 Houston Rockets