Goal 760 khung thei Ronaldo

"Cristiano Ronaldo-a'n goal 760 a khung - world record ni thei a ni - Juventus chuan Napoli hnehin Italian Super Cup an la," tiin media rintlak BBC chuan an tarlang a, khawvela goal khung hnem ber chungchanga inhnialna awm thei lakah an ṭawng fimkhur hle.

Media tam takin Ronaldo hi khawvela goal khung hnem ber a ni, tiin an tarlang a - BBC chuan he thil hi a dik chiah em tih an hre bik lo. Thu inchuh awmlai khaikhawm theihna pakhat chu zawhna (?) chauh a ni rih.

Ronaldo-a'n goal 760 a khung hi sawisel tur a awm lo. Sporting Lisbon (5 goals), Manchester United (118), Real Madrid (450) leh Juventus (85) bakah Portugal tana goal 102 a khungte hi felfai taka chhinchhiah thlap an ni a, sawisel theih a ni lo.

Tun hma chuan statistics hi felfai taka chhinchhiah vek a ni lem lo thung. Rec.Sport.Soccer Statistics Foundation (RSSSF) tarlan dan chuan Czech Republic striker goal khung thei tak hian match 530 aṭangin goal 805 zet a khung angin an chhinchhiah. Mahse a goal khung zinga 27 hi Rapid Vienna reserve team tan leh, inelna hnuaihnung tana a khung niin an sawi - goal ṭhenkhat pawh ram tan official match ni lem loa a khung tiin an sawi a, Josef Bican-a goal khung anga an pawm chin chu goal 759 a ni.

Mumal taka chhinchhiahna fel tak a awm loh avangin inhnialna tam tak a awm thei. Romario-a'n kum 2007 khan a goal 1000 khung tlin a lawm. Mahse heng a goal zingah hian youth team bakah friendly leh testimonial match aṭanga a khung pawh a chhiar tel.

King of Football tia an sawi Pele chuan Instagram-ah, "Goal khung hnem ber (1,283)" tiin a indah ve bawk. Tu nge goal khung hnem ber tih chu zawhna chhan mai theih loh leh inhnialna tawp thei lo tur a ni ta niin a lang.

Tun hnai khan Lionel Messi-a'n club pakhat tana goal khung ber ber record a siam. Pele-a'n Santos tana goal 643 a khung chu a khum. Mahse, Brazilian club hian thu chhuah thar siamin Pele-a'n club mal tana a goal khung zat hi, friendly match chhiar telin goal 1091 niin an siam ṭhatsak leh hnuhnawh a ni.