Super Cup champion Juventus
Juventus chuan Napoli 2-0 a hnehin a vawi kua nan Italian Super Cup an la a, manager Andrea Pirlo-a'n team enkawl hna a thawh aṭanga a nomawi hmasa ber a chawi - Italian tlangval tan mellung pawimawh phun ni a thleng.
Italian champion tan Cristiano Ronaldo leh Alvaro Morata ten goal khat ve ve an khung. Napoli lamin penalty hmu mah se Lorenzo Insigne-a'n a hlah. Coppa Italia final-ah Old Lady vanduai mah se tunah chuan thawnthu a danglam ta.
A goal har
Nilaini zan Mapei Stadium a inkhelah Juventus lamin an hun ṭha neih hmasa lam an chhawr ṭangkai thei lo a, match dang ang bawkin Napoli chuan an tlarhnung phui chu an innghahna lian tak a ni ve thung.
Minute 64-naah goal hmasa kan hmu chauh, corner aṭanga ball lo kal Tiemoue Bakayoko tih per chu Ronaldo-a'n yard ruk vel leka hla aṭangin a hlap lut a, keeper David Ospina tan dan theih a ni lo.
Gennaro Gattuso naute an tlawm duh bik lo, hun tawp hma minute 10 chauh awm tawhah penalty hmuin si phurh sut theihna remchang an nei. Mahse penalty pet tura rawn ding chhuak Insigne-a'n goal zawnah a pet thei lo.
Hun tawp dawnah Napoli lamin nawr viau mah se counter attack aṭangin Pirlo nauten an vaw let thut, chak taka ball tlanpuitu Juan Cuadrado chuan Morata pe in Spanish striker hian chak nemnghehna goal a khung.
A hmasa ber
Juventus junior team enkawl tura tih a hnih hnu lawkah Pirlo chu senior team coach atan ruat a ni a, team enkawl lama tawnhriat nei lo chungin a chungah mawhphurhna sang tak a tla - tih fuh loh nei nual mah se a pawimawh ber nomawi a la.
Pirlo chuan, "Coach ka nih hnua title hmasa ber lak zet chu a lawmawm takzet. Inter Milan kan hneh loh hnu lawka hetiang dinhmun kan luah zui thei hian a ti lawmzawm zual, player zawng zawng an khel ṭha vek," tiin a sawi.
A zawna season kua Serie A champion ni thei Old Lady hi legaue table-ah pangana an ni mek, hmahruaitu AC Milan an phak lohna chu point 10 a ni; match khata an khelh tlem avangin an inkar hi an la sawr zim leh thei thung.
Milan bakah Inter leh Napoli ten 'Scudetto' an chuh ngam avangin season dang aiin nomawi chawi a harsa dawn. Pathianni zana Bologna an mikhual hunah point thum hmuh chhunzawm lehnghal an tum ang.