Spain-ah lawm hlawh lo Bale a kir

International break a zo a, player-ten hlawh petu an club ṭheuh panin puanthuah an tel a, Euro 2020 khel tura Wales inpetkai puitu Gareth Bale pawhin Real Madrid lam a pan leh ta. 

Midang zawng aia mahni club pana Bale kir chanchinin ngaihven a hlawh chhan hi Welsh forward chet dan vang a ni a, Hungary laka 2-0 a an chak zawh hnu lawkah Real tih el zawngin a che. Bale hian Wales flag a, "Wales.Golf.Madrid. In that order," tih chuanna chu hlim hmel takin thla a lakpui a, chumi awmzia chu Wales dawtah golf a dah a, Real Madrid a ngai pawimawh lo ber tihna a ni!

Real Madrid hian zanin dar 1:30-ah league match khel turin Real Sociedad an mikhual dawn a, mipui hmuh chak chu eng thilin nge Gareth Bale lo hmuak dawn, tih hi a ni. 

Hliam vanga buai ngun ve tak Bale hi tun hnaiah hliam vang vekin thla khat vel chu Real tan a inlan thei lo a, mahse Euro 2020 qualifier pawimawha Wales-in  Azerbaijan leh Hungary an hmachhawn dawnin a dam leh lawi si!

Real boss Zinedine Zidane-a'n Bale damchian loh thu a sawi reng laia Bale-a dam thut hian Spain-ah mak tih a hlawh a, Spanish media-te chuan Tottenham Hotspur forward hlui chanchin hi chaw tui berah an nei. 

Spanish media ṭhenkhat chuan Bale-a dam chu thil mak a nih thu an sawi a, 'Miracel in Wales' (Wales-ah thilmak) tih hialin an sawi - Bale hian Azerbaijan leh Hungary a hmachhawn zui zat! Chu mai a ni lo - Madrid khawpuia lawm hlawh lo tak forward hian amah hawtute chu ngawi renga thlir liam a tum bik lo a, ngeiawm takin a chhang let. A sawp chu nasa tak a ni. 

Wales. Golf. Madrid. 

Nipui lai khan Real leh Bale inkar buaina hi a inṭan tawh a, a bul ṭantu zingah Zidane a tel. French manager hian ualau takin Bale a mamawh loh thu a sawi a, "A chhuah vat hi tu tan pawh a ṭha zawk," a ti. Hetihlai hian Spanish media lam chuan Bale hian Real squad-a zin ve ai chuan golf khelh mai mai a thlang zawk niin an lo sawi ve bawk a, Bale-a'n hun ṭha a neih ve leh dim lo takin a chhang let. 

Spanish media bawk an hrang a, Bale-a chet dan chu 'puitling lo' tiin an sawisel nasa hle. Spanish chanchinbu lian Marca chuan, "Inzahlohna. Dik lo. Lawmna chang hre lo - hei hi a pawimawh dan indawt a ni," tiin an chanchinbu phek hmaah an ziak kuau!

Spain-a chanchinbu chhiar hlawh dang AS chuan Bale-a'n golf a khel lai thlalak hmangin, "Buaina karah Bale," tih thupui an hmang a, Welsh forward tan pressure an siam belh leh ta. 

Bale-a thil tih vangin khelmual chhung aiin pawn lamin sawi a hlawh zawk a, Real Madrid thuneitu tan chuan Bale-a chet dan kha lawmawm lo tawp khawk a ni - mahse Welsh forward hian training a zawm leh tawh. Real Sociedad hmachhawn thei dinhmunah Bale a ding tihna a ni a, hriat châkawm chu Zidane-a'n khelmual pawna chanchin ngah zawk a player hi a chhawr duh ang em? tih hi a ni.

Zidane hi hriatthiam a har ve bawk - nipui laia khati taka a duh loh kha Bale hi a ni a, club thuneitu sang lamin an chelh vang chauhin Chinese Super League lamah a kal lo. Mahse, a duh lo bertu Zidane hian season ṭan hnuah a inhliam a nih loh chuan regular takin Bale a chhawr leh lawi a, October 14 hnua hliam vanga a chhawr tawh loh player hi zaninah a chhawr a nih pawhin a mak lo ang.

Real hian khelmual pawnah chanchin lawmawm lo dang an neih belh a, kum 28 mi forward hi gym-ah chesualin a ke zung ṭangah hliam hi a tuar - thla khat vel chu Real tan a inlan thei lo ang. Vazquez hian a chawn hliam vangin kar ruk chhung chu khelmualah Real Madrid jersey a ha thei tawh lo a, tunah a chetsual vangin hliam dang a neih belh leh ta - James Rodriguez, Nacho leh Marco Asensio te chu inhliam sa an ni. 

Football khawvelah khelmuala chetsual vang niloin player an lo inhliam fo tawh. Kum 2017 khan Marco Asensio chu a ke hmul a ziahna lama a inhliam avangin Champions League-ah a inlan thei lo tawh! Goalkeeper Santiago Canizares chuan a keah bottle a intih tlak avangin World Cup 2002-ah khan Spain ai a awh theih loh phah tawh a, Sevilla midfielder Ever Banega chu petrol a thun laia a car handbrake a hman theihnghilh avangin a ke a in chiltir a, thla ruk a lo chawl tawh bawk.

Vawiin tlai dar 5:30-ah La Liga hmahruaitu Barcelona an inlan dawn a, khualmualah Leganes an lenchilh ang. Barca hian league-ah hma hruai mek mah se Real nen an point hmuh zat a in ang a, goal difference vanga sang chauh an ni. 

La Liga match thuma tlawm tawh club hi Leganes lakah an chak zo lo a nih chuan Pathianni zana inlan tur Real Madrid an phur sawt ang a, Barca an tlanpel thei tih hre chungin an inlan ang. Barca hian khualmualah rin loh takin Levante chu 3-1 in an lo ngam lo tawh a, Catalan club ṭantute tan Leagnes mualah rilru hahdama awm ngawt a theih loh ang - coach Ernesto Valverde chu a dinhmun a derthawng mek nia sawi a ni bawk. 

Zanin dar 11:00-ah Atletico Madrid an inlan dawn bawk a, Diego Simeone naute hian khualmualah Granada an lenchilh ang. Hriat tel tur atana ṭha chu Atletico hian point khat chauhin Barca leh Real an phak lo.