Engtin nge Playoff leh Fixtures an kalpui dawn?

UEFA European Championship vawi 16-na chu nakkum June 12 - July 12 chhung hian Europe ram 12-a khawpui 12-ah khelh a ni dawn. Tunah hian inelna hmachhawn tur team 24 khel tur zinga 20 a hriat tawh a, team li dang hi playoff hmanga zawn a ni ang.

Tun hma chuan playoff  hi qualifier aṭanga tling zo lo zinga ti ṭhaten an zawng ṭhin a, tun ṭumah erawh Nations League hmanga zawn a ni dawn ta thung.

Nations League hmasa ber hi nikum September 6 aṭangin khelh ṭan a ni a, friendly match tam zawk thlak nana tih a ni. Hetah hian Europe ram 55 chu league paliah an ṭhat dan mila dah hran an ni a, league pakhat zel hian Euro 2020-ah quota pakhat an nei zel.

Chutihrualin qualifier aṭanga an tlin chuan an hnuai chiaha awmin an hmunruak an hnawhkhat thei. League A-a dah zingah Iceland an la tling lo a, team dang an tlin vek avangin hmunruak pathum hi League C-a ram pali Bulgaria, Israel, Hungary leh Romania aṭanga thlan tur a ni.

League B aṭangin tling lo pali Bosnia & Herzegovina, Slovakia, Republic of Ireland leh Northern Ireland chiah an awm avangin an dik nghal a, League C aṭangin group winner Scotland, Norway leh Serbia te chuan playoff an khel thei dawn. Group winner pakhat dang Finland an tlin tawh avangin an hmunruak hi Bulgaria, Israel, Hungary leh Romania te zinga vannei berin an hnawhkhat dawn a, pathum dang hian League A playoff an khel ang.

League D aṭangin team khat mah qualifier kaltlanga tling an awm lo a, group winner pali Georgia, North Macedonia, Kosovo leh Belarus ten hmunruak pakhat an inchuh dawn. Nations League hmanga playoff zawn a ni hi team nem zawka ngaih League C leh League D-a awmte tan chuan vanneihna a ni a, Europe inelna sang bera khelh theih dan kawng a inhawng.

Playoff-ah hian semifinal (26 March 2020) leh final (31 March 2020) a awm dawn a, single leg-a khelh tur a nih avangin league an khelh laia ranking nei ṭha zawk mualah zel khelh a ni ang. Playoff khel tur draw hi vawiinah neih tur a ni.

Euro C'ship group stage draw  hi November 30 hian Bucharest, Romania-ah neih a ni dawn. Qualifier an khelh dan aṭangin seeded siam a ni a, champion lai Portugal chu pot 3-ah awm pha chauhin finalist leh world champion France pawh pot 2-ah an awm.

Euro 2020-ah hian inelna thlengtute an tling nghal lo a, an khelhna tur hmunah erawh duhsak an ni a, an awmna group a hriat tawh bakah an mualah match hnih tal khel tura tih an ni. Inelna thlengtu zingah Italy (Group A), Denmark leh Russia (Group B), Netherlands, (Group C), England (Group D), Spain (Group E) leh Germany (Group F) te an tling tawh a, Republic of Ireland (Group E), Romania (Group C), Scotland (Group D) leh Hungary (Group F) te playoff hmangin an la tling thei a, Azerbaijan erawhin beisei tur an nei tawh lo.

Path A: Iceland, Bulgaria/Israel/Hungary/Romania*

Path B: Bosnia and Herzegovina, Slovakia, Republic of Ireland, 

Northern Ireland

Path C: Scotland, Norway, Serbia, Bulgaria/Israel/Hungary/Romania*

Path D: Georgia, North Macedonia, Kosovo, Belarus

*Ram pali zinga pakhat hi Path C-ah an awm ang a, a dang pathum hi Path A-ah an awm ang.