
Harsa mah se Pathian a awm - Dallalmuon

India Under-17 captain Dallalmoun Gangte chuan a football zinkawngah harsatna tawh chang nei mah se, Pathian a awm avanga a thlamuan ṭhin thu a sawi - Kolasib Hmarveng rawlthar hi AFC Asian Cup qualifier khelin a thang mek.
Dallalmoun chuan, "Sum leh paiah harsatna awm ṭhin mah se, theihtawp chhuahin kan bei a, engtiklai pawhin Pathian a awm reng ṭhin," a ti - Dallalmoun hi Churachandpur, Manipur-a piang leh seilian niin, kum 2023 khan Kolasib-ah an pem a, a nu leh a nau pathumte nen Kolasib Hmarvengah an khawsa.
India U17 captain chuan, "Ka nu hi Kolasib khaw daia quarry-ah a thawk a, chhungkaw chawm nan nitin a thawk chhuak ṭhin. Ka sum hlawh chhuah ve ang ang hi ka nu hnenah ka thawn ve ṭhin. A la tam lo a, mahse, tlem azawnga ka lo chhawk zangkhai ve theih takin ka ti a ni," a ti.
Kum 16 mi Dallalmoun hi Asian Cup qualifier khelh mekah player hmuhnawm ber pawl a ni - match thum khelh tawhah goal sarih a khung der tawh a, a finishing tawih leh positioning ṭhat vangin fak a hlawh viau a, khelmualah hruaitu ṭha a ni bawk.
Dallalmoun-a captain-na hnuaia khel India U17 hian qualifier group E-ah Singapore (4-2), Guam (12-0) leh Palestine (4-1) an hneh tawh a, zanin dar 6:30-ah qualifier thlengtu Malaysia an hmachhawn leh dawn.
Blue Colts hian draw result ringawt an hlawh chhuak a nih pawhin Asian Cup khel turin an tling tawh dawn a, zanin an inkhel tur hi a pawimawh hle.
NorthEast United youth team tana khel mek Dallalmoun chuan, "Kan thawkrim a, theihtawp kan chhuah. Vawi thum khelhah kan la chak vek a, hei pawh kan thawh ho ṭhat rah a ni a, camp-ah hian chhungkua ang maiin kan khawsa ho a ni," a ti.
India U17 squad-ah hian Dallalmuon bakah Ruantlang defender Zoramdinthara, Khawzawl midfielder R. Lawmsangzuala, Armed Veng South defender Lawmsangzuala leh Thingsai defender Malsawmtluanga te an awm bawk a, Asian Cup U17 khel thei dinhmunah Mizo rawltharte an ding mek.
AFC U17 Asian Cup 2027 hi May 12-29 inkar khian Uzbekistan-ah khelh tur a ni a, ram 16 chauh an tlin dawn avangin qualifier-ah hian group tina hmahruaitu bak an tling dawn lo - India tan group hmahruaitu ni turin Malaysia inhnehtawkpui a tawk tawh.