Jersey no. 7 hatu Forbs-a'n Portugal chakna goal a khung

Cristiano Ronaldo-a'n ram tana inkhelh a chawlhsan hnua an match hmasa berah Portugal-in Denmark an hneh lo a, Thawhlehni zanah pawh mualpho nawn thei dinhmunah an ding. Cardiff City Stadium-ah Wales-in Portugal lakah hma hruai mah se Jorge Jesus hoten lehthalin 3-2 in hnehna an chang. Chakna goal khungtu Carlos Forbs hian Ronaldo kalsan jersey no. 7 a ha.

Portugal tan Bruno Fernandes-a'n minute 11-naah box pawn aṭangin mawi zetin a pet goal a, David Brooks leh Sorba Thomas te hmangin Wales-in an lehthal. Team ṭha zawk mikhual team-in first half-ah vek siphurh an sut hman a, Pedro Neto-a'n minute 43-naah siphurh sutin minute 70-naah Club Brugge winger Carlos Forbs-a'n chakna goal a khung.

Ronaldo chawlh hnua Portugal jersey no. 7 hatu hmasa ber Forbs hi bench aṭangin minute 59-naah a lut a, mual dinglamah a tlan. Kum 22 mi Forbs hian box chhungah ball lalutin a ke vei lamin ṭha zetin a pet lut. Forbs hi Ajax academy chhuak a ni a, sulhnu lian sawi tur a la nei lo.