
Mizo tamna Nagaland United inlan zan

Indian Football League-ah zanin dar 6:30 hian Nagaland United-in Birsa Munda Athletic Stadium, Rourkela-ah Samaleswari SC a hmachhawn ang. Inkhelhna tur hmun hi Indian Women's League club Nita Football Academy pawhin khelmual atan an hmang a, an captain chu Mizo nula Cindy Remruatpuii Colney khelhna a ni.
Nagaland United hian season ṭan hmain Aizawl FC hnen aṭangin IFL khelh phalna an lei a, an player-te pawh MPL-a intat hriam Mizo vek an ni. Hei vang hian Mizoten Nagaland inkhel an ngaihven a, Samaleswari lakah pawh Mizo mipui ṭan an hlawh ang.
NUFC hian an match hmasa berah Real Kashmir an hneh a, match hnihnaah table chung bera awm mek Gokulam Kerala an hneh lo thung. Gokulam lakah chak zo lo mah se Mizo player-te an che ṭha a, foreigner tel lo chungin Kerala club hi an khel tawk hle.
Vawiin tlai dar 4:00 hian champion beiseiawm zinga mi Shillong Lajong-in Dempo Sports Club an tlawh dawn. Lajong hian Chanmari FC lakah point khat chauh an hlawhchhuah hnuin Sreenidi Deccan an hneh a, MPL champion chakna hmun Goa-ah point thum hlawhchhuah ve an tum ang.