Mizoram Police-in chakin bul an ṭan

75th B.N. Mullik Memorial All India Police Football Championship-ah nimin zing khan Mizoram Police chuan match hmasa berah Andaman & Nicobar 2-1 in an hneh. Chandrapur ground, Agartala-a inkhelah hian Police hian first half-ah goal chhuah hmasa mah se R. Malsawmtluanga leh Lalbiakhlua ten goal an khung.

Mizoram Police tana chanchin lawmawm chu kum li hnuah Vanlalnghenga'n competitive match a khel leh ta a, ngai a awh chho thei a nih chuan MPL14-ah pawh left back-a an inngahna tur a ni thei ang. Nghenga hi MPL-ah Chanmari West, Chawnpui, Chanmari FC leh Aizawl FC tan khel chhoin ISL club thlengin an rim chhoh laiin tualchhung inelnaah a khup a tih nat avangin hun rei tak a chawlh phah a, Andaman lakah hian hul ṭanin darkar khat vel a inlan a ni.

All India Police Football Championship-ah hian Mizoram Police hi kum 2023 khan a vawi khat nan an champion tawh a, kuminah champion nawn leh an tum dawn. November 19, Ningani zing dar 6:00-ah CRPF an hmachhawn ang a; Punjab (Nov 20, 8:30 am) leh Puduchery (Nov 22, 11:00 am) te an la hmachhawn dawn bawk.

Mizoram Police coach C. Vanlalchhuanga chuan, "Match hmasa ber hi khelh a har ṭhin a, goal chance kan hlah nasa. CRPF kan hmachhawn hunah ṭha lehzuala kan theih ka beisei a, khelmual chhung leh pawna ka naute chet danah ka lawm hle," tiin Vanglaini a hrilh.