Kum chanve leka MPL club ni thei - Bawngkawn FC

Aizawl DFA-in kumin June 26, Zirtawpni khan First Division leh Second Division club hmunruak an lilam a, First Division hmun ruak pakhat chu Rs 50,000 aṭangin an lilam ṭan. Football ngaina Bawngkawnin an veng football-a hma a sawn zel theih nan club neih ngei an tum a, Life Care Pharmacy neitu Vanlalpeka hmalaknain club lilamnaah telin First Division club hmunruak chu Rs. 52,000-in an chang.

First Division club an chan hnuah club enkawltu tur board an dinfel nghal a, coach atan Ricky Lallawmawma an lalut. Durtlang pa Ricky hian coaching-ah sulhnu a la nei lo a, mah se player a nih lai aṭanga a khelhpuite zah rawn a nih bakah tawnhriat nei ṭha bik a ni.

Bawngkawnin Ricky theihna an hria a, a khelh an phalsak tel a, player leh coach a ni kawp. First Division-ah beisei ang result an nei lo a, league round-ah pangana an ni. Mahse, Aizawl FC Academy-in semifinal an khelh theih tak loh avangin Bawngkawn FC an vannei a, Ricky leh a hote hian an hun ṭha neih hi bawhpelh loin League Winner Ramhlun North hnehin final an lut. Nomawi inchuhnaah Bawngkawn hian Chawnpui FC 5-0 in an sawp a, an champion bakah MPL Qualifier khelh theihna ticket an nei bawk.

Qualifier-ah Ramhlun North hneh lo mah se SYS FC hnehin playoff khel turin an tling a, First Division club tan MPL khel zo club hneh hi thil harsa a ni. Mahse, Bawngkawnin hmabak harsa bik paltlangin MPL khel turin an inpettling. Bawngkawn hian First Division club an nih aṭanga ni 138 (thla li leh ni 16) lekah MPL an khel dawn a, an record hi a ropui hle.

Bawngkawn Footbal Club Board member-te :

Director Vanlalpeka (Owner)

Chairman PC. Vanlalchhuana

Vice Chairman R. Lalchhuansanga

Secretary Dr. K Vanlalawmpuia

Treasurer Laldinsanga

Manager C Lalthakima

Media & Info Ramluahpuia

Coaching Staff-te:

Coach Ricky Lallawmawma

Asst Coach Victor Lalbiaktluanga

Manager C. Lalthakima

Physio Lalmuanchhani