Alisson-a'n contract thar a duh
Liverpool goalkeeper Alisson Becker chuan Liverpool-ah contract thar ziah a duh thu a sawi a, kum 34 mi keeper hian Merseyside club-a châm zel a duh–Reds tan hun rei tak hnua top class goalkeeper an neih hi chelh a finthlak ang.
Brazil international hian kum 2018 khan AS Roma aṭangin Liverpool hi pound maktaduai 66.8-in a zawm a, Reds a cham chhungin nomawi chawi theih ang chu a chawi kim–a record hi uanpui tham a ni. Mahse, Alisson hian tun season zawh rualin contract a hmang zo tawh dawn a, Reds-in contract thar an la zawrh rih lo.
Alisson chuan, "Liverpool-a cham ka duh. Match zawng zawng khel turin ka rilru ka seng a, chumi piah lamah chuan he hmuna cham hi ka châk a ni. Chutihrual chuan thil thleng thei tam tak a awm tih ka hre ve tho a, ka duh dan ber erawh châm a ni.
"Liverpool-ah hian ka hlim a, ka chhungte pawh an hlim hle," a ti a, English club-a cham zel a duh. Alisson chuan, "Nomawi chawi duhin ka la tuihal reng a, ka theih anga rei chu a sang thei ang bera khelh zel ka duh a ni," a ti a, hahdam zawka inkhel tura sum tamna lam pan a rilruah a lang lo.
Alisson hi tun hnaiah sawisel hlawh mah se, an league match hnuhnung bera Crystal Palace an hneh ṭumin a khel ṭha thlawt a, kar hmasa lawk khan coach Andoni Iraola pawhin a keeper chu Liverpool-ah châm se a duh thu a sawi.
Iraola chuan, "Alisson-a tan Liverpool-a a season tawp ber a ni ang em, ka sawi thei lo. Mahse, ka duh dan chuan Anfield-ah hian rei tak la cham se, ka ti a ni," a ti–Brazil keeper hi nipui lai khan Juventus nen sawi zawm hman a ni a, mahse, a tawpah chuan Liverpool-a cham a thlang.
Reds keeper chuan contract thar chungchanga Liverpool nen an indawr leh dawr loh zawhna chu, "Keimah nen chuan kan indawr lo a, mahse, ka agent leh club an inbe mek," a ti a, Liverpool fans tan thawm rimawi a tling ang.
Liverpool hian nipui transfer-ah senior player Mohamed Salah leh Andy Robertson an chhuahtir a, season tawp rualin Alisson leh Virgil van Dijk contract a tawp tawh dawn bawk–thutlukna siam tur pawimawhin a hmuak mek e.