Ramsanga'n medal lak a ṭhulh thei lo

Mizo shuttler C. Lalramsanga chuan thla hmasa lawka medal a lak hnuah international tournament-ah medal a la leh ta - Durtlang rawlthar Ramsanga hian Telengana International Challenge-ah mixed doubles category-a inelna hmachhawnin, bronze medal a hlawh chhuak a ni.

Ramsanga hian October 27 - November 1 inkara neih KBA Diamod Jubilee India International Challenge 2026-ah khan mixed doubles-ah tho inelna a hmachhawn a, Angel Punera nen ṭangdunin, silver medal an la.

Durtlang rawlthar hian hahdamna hun pawh nei hman loin, November 3 aṭanga neih ṭan Telengana International Challenge hi a hmachhawn zui leh a, Hyderabad-a neih inelnaah Keerthy Manchala nen ṭangdunin, semifinal-ah India player lar Ashwini Ponnappa leh Satish Kumar Karunarakan te hmachhawnin, a vanduai zawkah a ṭang a, bronze medal-a lungawi zir a ngai ta a ni.

Kum 19 mi Ramsanga hian November 24, Thawhlehni aṭanga ṭan tur Syed Modi International-ah main draw a chang phak dawn a, inelna hmachhawn turin a inbuatsaih leh nghal ang.

Lucknow-a neih tur tournament hi Super 300 tournament a ni a, khawvel huapa player ṭha leh langsar engemaw zat an tel dawn avangin Ramsanga tan pawh a awlsam dawn lo.