First Division-ah Bawngkawn FC an champion

Life Care Pharmacy ADFA I Division League 2026-27-ah Bawngkawn FC-in final-ah Chawnpui FC 5-0 a sawpin an champion. Ricky Lallawmawma kaihhruai Bawngkawn hian final-ah inkhel an thunun a; Lallawmsanga, Lalkhawpuimawia (Mapuia), Dicken, Lalremliana leh Peter Hlychho ten goal khat ṭheuh an khung.

Bawngkawn hi League round-ah pangana ni mah se Aizawl FC Academy ten an khelh chhunzawm theih loh avangin semifinal-ah an inlan. Final khel tur zawnnaah Bawngkawn hian League Winner Ramhlun North 1-0 in an hneh.

Durtlang Football Stadium-a inkhelah Bawngkawnin an player neih ṭhat rang an seng a, tlarhmaah Mizoram tana pawha khelh ho tawh LS-a leh Mapuia te an hlauhawm a, goal khungtu hmasa pahnih an ni.

Khelmual chhuga langsar Dicken-a'n minute 43-naah ama pualin a khung a, first half tawp hmain Lalremliana khung tur a siamsak leh bawk. First half-ah goal li an khung tawh avangin Bawngkawnin nuam sa zawkin an khel thei a, injury time-ah Peter Hlychho-a'n goal ngana a khung.

Final-ah hian goal hmahruai khungtu Melbuk tlangval Lallawmanga chu man of the match-a thlan a ni a, coach leh defender player pawimawh ni kawp Ricky Lallawmawma chu best player-a a thlan a ni. First Division-a an champion avangin Bawngkawn hi MPL14 Qualifier khel turin an tling a, League Winner Ramhlun North nen Aizawl DFA ai an awh ang.