World Cup-ah Mizo hming a mawi

FIFA Under-15 World Cup-a an match hnuhnung berah India chuan 6-4 in Cuba an sawp a, khawvela football thiam, naupang rual fuankhawmnaah 87-na ni chungin tournament an khar.

A vawi khat nana neih FIFA U15 World Cup hi Azerbaijan chuan thlengin, team 189-in inelna an hmachhawn a, Indian naupang rual hnuaiah hian ram 102 an awm tihna a ni - football khawvela India dinhmun thlirin result ṭha tih loh rual a ni lo.

India hian Ningani zan khan Kazakhstan an hmachhawn a, Mizo naupang Victor Lalawmpuia chuan goal li ngawt khungin, R. Lalremruatfela'n goal khat a khung bawk a, mahse, Kazakhstan lam hian goal nga an khung ve tho avangin, 5-5 in an inhnehtawk.

Penalty hmanga chak zawk zawn a nih hnuah, Kazakhstan lam hian 5-4 in penalty-ah hnehna an chang a, India hian 87-na nih inchuhin, nimin khan Cuba an hmachhawn zui.

Cuba nena an inkhelah pawh India tan Victor Lalawmpuia leh R. Lalremruatfela ten goal hnih ve ve an khung a, Nibas Wahengbam chuan goal hnih khung bawkin, 6-4 in hnehna an chang.

India hian group K-a awm chungin inelna hi an hmachhawn a, group stage-ah hian Laos (4-2), Cameroon (2-1) leh Bahrain (4-3) te an hneh a, mahse, Grenada (3-3) chu draw-in, Senegal (6-1) lakah an tlawm bawk a, Tier C-ah an tla thla.

Tier C match hmasa berah India hian 2-1 in Honduras an ngam lo a, Trinidad & Tobago chu 3-2 in an hneh leh thung. Rin loh taka Afghanistan (2-1) an ngam loh hnuah, Kazakhstan chu penalty-in an ngam lo bawk a, niminah Cuba chu 6-4 a hneh chungin tournament an khar ta a ni.

India player zingah R Lalremruatfela chuan goal kua ngawt khungin, top scorer a ni a, Mualṭhuam North naupang hi FC Madras Football Academy aṭanga inzir chhuak a ni.

Ruallung naupang Victor Lalawmpuia'n goal riat khungin, Remrema dawta India U15 tana goal khung hnem a ni a, Khelo Centre Saitual chhuak niin, tun hnaiah Lushai Academy a zawm.

Champhai Venglai naupang C. Lalhmingropuia pawhin India U15-ah hmun pawimawh a chang a, Remrema nen captain armband pawh an hreng phak hial. Mizoram junior team tan pawha khel tawh niin, Reliance Naupang League U14 aṭanga U18 thlengin a khel vek.