Warriors an chak ve ta

NBA season thar ṭan hnua a vawi khatna atan Golden State Warriors chuan hnehna an chang ve ta a, nimin zing khan Denver Nuggets chu 134-114 in an hneh. Warriors tan rookie player Yaxel Lendeborg a che ṭha a, 'double double' a siam.

Ball Arena, Denver-a inkhelah Warriors-in bul an ṭan chhe lo a, mahse Nuggets tan Nikola Jokic leh a ṭhiante an ṭang thei a, DeMar DeRozan a khelh ṭhat bawk avangin first quarter-ah 32-28 in Nuggets in hma an hruai.

Second quarter-ah hliam vanga match khat a chawlh hnua lo kir Stephen Curry a inlar a, kum 38 mi American point guard hian point score hnem lo mah se, court chhungah a awmin Warriors-in hma an sawn.

Nuggets an inthlahdah laklawh a, second leh third quarter-ah point 30 an score tlin theih loh laiin Warriors game a ṭha zel thung. Third quarter-ah point 40 zet an score a, an hmahruaina an tizau ṭan.

Fourth quarter-ah Warriors hian 34 an score leh a, Nuggets-in point 30 nei leh mah se quarter danga an score hnem tawk loh an tuar a, Warriors-in point score bakah an defence ṭhatzia an pholang.

Kum 24 Lendeborg chuan point 31 neiin assist 12 a nei bawk a, ani aia score hnem an awm lo. Curry (24), Brandin Podziemski (18) Gui Santos (13) leh Al Horford (11) ten Lendeborg an thlawp ṭha bawk.

Hetihlai hian Nuggets tan DeRozan, Jokic, Jamal Murray leh Bryce Hopkins ten point 10 score tling mah se an ṭhianten an thlawp ṭha tawk lo a, tun season-a a vawi hnih nan an tlawm.

Warriors tan Curry bakah Draymond Green a lo kir leh tawh bawk a, veteran player pahnih awm lohin Warriors chu team dang hlak an nih avangin an chet ṭhat nan an dam ṭhat a pawimawh.