Boxing hmasawn nan Neeraj Goyat leh Bull-Ten te rawn pen chhuak

Professional boxer Neeraj Goyat leh sports equipment company Bull-Ten te chuan Mizoram chhunga boxing-in hma a sawn nan Dr Lalmuanpuia Boxing Academy chu nuai 10 man dawnin an ṭanpui. Thilpek hlanna hi October 26, Thawhṭanni tlai khan boxing academy neihna hmun Ramthar Vengah neih a ni.

Neeraj Goyat team leh Bull-Ten ṭangkawp hian boxing ring leh gym extension atan Rs 6,00,000 vel an pe a, ring accessories atan Rs 50,000/ vel pe lehin Rs 60,000 man hu boxing gloves, bag, pad leh handwraps te an pe bawk. Hei bakah hian thla tin supplements Rs 10,000 man vel an thawh ṭhin bawk ang.

Haryana professional boxer Neeraj Goyat chuan, "North East fighter-te hian tumruhna leh thiamna sang tak nei mah se, hmunhma leh hmanrua ṭha tawk loh vangin khawvel huapa inelnaah harsatna an tawk fo ṭhin. Tuna hmalakna hi infiamite inthlawp tawnna a ni a, Aizawl-a boxing zirlai ṭhalaite tan professional taka inbuatsaihna hmun ṭha siamsak hi hmangaihtu leh thlawptu an nei a ni tih a hriattir a ni. He gym aṭang hian khawvel champion thar an rawn chhuah ngei ka beisei a ni," tiin a sawi.

Dr Lalmuanpuia Boxing Academy hi kum 2020 khan Dr Lalmuanpuia leh NT Lalbiakkima te hming chawiin NTP Boxing Academy tia din a ni. Amaherawhchu Dr Muanpuia a thih tak avangin a hming hi Dr Lalmuanpuia Boxing Academy tiin an thlak a, Mizo boxer ṭha Lalmuanpuia'n (Mampuia) boxing hmangaihnain a enkawl chhunzawm zel a ni.

Boxing Academy-ah hian mi 10 chiah a inziahluh theih a, tunah hian seat ruak a awm tawh lo. Admission fee hi Rs 2500 a ni a, monthly fee a awm tawh lo. Sum lama harsatna nei chu admission fee pawh hi an awl ṭhin bawk. Academy hi Project Fitness, Bethlehem nen an ṭangkawp a, boxer ṭha bikte hian a thlawnin strength and conditioning coach Lalbiakzuala (Gtea) bulah personal training an nei ṭhin bawk.