Zanin aṭangin 'Mizo Inchai' Title fight

MBOCWWB Rahbi Chhertu Mizo Inchai Title Fight chu zanin aṭangin neih a ni dawn a, a ṭan zanah hian pate leh nulaihawlah title fight neih a ni dawn a, freestyle wrestling en tur a awm bawk ang.

Pate

Pate huanga champion lai Lalchhanhima chuan rokhawlhna a neih avangin a title a hum thei dawn lo a, Pachhana kawnghren kalsan tak hi B. Lalawmpuia leh Jony Lallawmkima ten an inchuh dawn.

Kum 2022-a lo champion tawh Awptea hi Saitual College Veng niin, a title la let turin an khaw mi tho Jony Lallawmkima a hmachhawn dawn a, wrestler pahnihte an inhre chiang dawn.

Kum 29 mi Awptea chuan, "Ka inbuatsaihna a ṭha a, ka title lak kir ngei ka tum. Huphruhna leh zâmna engmah ka nei lo a, tawnhriat ka neih ṭhat avangin ka phur tawh hle" tiin Vanglaini a hrilh.

Awptea hmachhawn tur Jony hian title fight a vawi khat hmachhawnna tur ni mah se, state level-ah medal a lo la nual tawh a, nikum Northeast Olympic-ah bronze a lo hlawh chhuah tawh bawk avangin zuam chi a ni dawn lo.

Jony chuan, "Awptea nen kan inhrechiang a, team khatah pawh kan awm ho ṭhin. Title fight ka vawi khat hmachhawnna tur ni mah se ka huphurh lo a, champion ngei ka tum," tiin Vanglaini a hrilh.

Nulaihawl

Nulaihawlah champion lai Elizabeth Rohlupuiin a title humhim a tum dawn a, Kolasib Saidan tleirawl Ruthi Lalhruaitluangi'n a kawnghren chhuhsak tumin a bei dawn.

Bawngkawn West nula Eli chuan, "Ka title ka humhim ngei ka inbeisei a, ka inbuatsaih ṭhat avangin ka phur tawh hle," tiin Vanglaini a hrilh. Eli hian title fight vawi hnih a hmachhawn tawhah a chak ve ve a, kuminah a champion leh a nih chuan a zawna vawi thumna tur a ni ang.

Eli chuan kumin title fight zawhah hian a champion a nih chuan, record siam a duh avangin nakkum aṭangin nulianah insawn a tum thu a sawi. Chutihrualin a title a humhim thei lo a nih chuan a lak kir hma chu insawn a tum loh thu Vanglaini a hrilh bawk.

Engtin?

Kumin inchaiah hian zan freestyle wrestling exhibition neih tura ruahman a ni a, zan tin pali zel a awm ang a, zaninah mipa match thum leh hmeichhe match khat a awm dawn.

Title fight hi zan October 30, Zirtawpni zan thleng neih tur a ni a, LPS Arena, Falkland-a neih tur niin ticket man hi Rs 50 a ni a, a tawp zanah erawh Rs 100 a ni tawh dawn thung.

LPS 1 leh LPS YouTube Channel-ah member tan live-in inchai zawng zawng hi pek chhuah a ni dawn a, member nih man hi Rs 179 a ni.