MPL level a sang - Steven Dias

Chanmari FC coach Steven Dias-a'n India ram football a hrechiang a, a inkhelh hun laiin ball pet thiam vangin David Beckham of India hminglem an pek a nih bakah Jamshedpur FC leh Odisha FC-ah te team enkawltu hna a lo chelh tawh bawk.

Steven Dias chuan, "Mizorama football inelna a sang em em a, Mizoram Premier League hi India ram hmun dang league-te nena khaikhin pawhin a ṭha ber zinga mi a ni. Calcutta Football League leh league dang chhiar tel vek pawhin player-te theihna sanna hmun a ni ang. Ramthar Veng pawh khelh an harsa a, final-a kan hmachhawn theih turah pawh duh thlan tur ka hre lo. Mizoram Police leh Dinthar te hi team ṭha tak ve ve an ni," tiin Vanglaini a hrilh.

Inkhel chungchang sawiin Chanmari coach Dias chuan, "Insiamṭhat nan ni thum chiah hun kan nei a, mah se ka naute leh ka thawhpuite zarah final kan khelh hi kan ring tlat. Duhthusama ṭhain bul kan ṭan a, ka naute khelh danah ka lawm hle," a ti.

Ramthar Veng manager Lalropuia chuan, "Team ṭha zawk an chak a, kan tluk lo deuh a ni. Ramthar Veng mipui chungah lawmthu ka sawi duh a, anni zarah tun hun thleng thei kan ni a, semifinal min ṭawiawmna ṭha tak avangin kan lawm takzet zet a ni," tiin Vanglaini a hrilh.