Vawiin aṭangin Inter Village Futsal

MBOCWWB MFA Inter Village Futsal Tournament 2026 chu vawiin aṭangin R. Dengṭhuama Indoor Stadium-ah khelh ṭan a ni dawn. Team 71 an tel a, first round-ah match sarih awmin vawiinah khelh zawh nghal tur a ni. Inkhel hi BR Studio YouTube channel-ah a en theih ang.

Futsal khel thiam veng Ramhlun Vengthar leh football khelh thiam veng Bethlehem Vengthlang te an inkhel nghal dawn. Team ṭha pakhat chu an tla nghal dawn tih a chiang. Sihphir Venghlunin football leh futsal an thiam a, Chanmari West nena an inkhel hi a hmuhnawm ang.

Aizawl khaw chhungah futsal ground a tam a, kil tinah futsal khelh thiam an awm tawh avangin team ṭha thliar thiam pawh a har. Chutihrualin India international David Laltlansanga (Avida) awmna Chawnpui erawh ṭha tura ngaih an ni a, inkhelh thiam veng Armed Veng leh Laipuitlang te pawh intum tawk viau tur an ni.

Tun ṭum inelnaah hian MPL player-te an inlan thei dawn a, tun karah Star Cement MPL13 khelh zawh a ni vek dawn. Second round tawp lamah chuan MPL final-a inlan player-te pawh an inlan vek thei tawh dawn a, futsal inelna sang tak chhawp chhuah a ni ang.