Mizoram Police FC = Dinthar FC

Star Cement MPL13 semifinal first leg-ah Zirtawpni zan khan Mizoram Police leh Dinthar FC te 1-1 in an inhnehtawk. Mizo club lian pahnih hi khelmual chhungah an intluk tawk a, final lut tur hriatthiam a har hle. October 27, Thawhlehni zan dar 8:00-ah second leg khelh a ni ang.

RG Stadium-ah Dinthar FC-in ṭantu an nei ṭha a, league round-ah ṭum hnih Mizoram Police hneh lo mah se semifinal-ah goal khung hmasa zawk an ni. Ṭan phat aṭangin inkhel hmuhnawm chhawp chhuah a ni a, Dinthar tlarhnung tan Malsawmfela a hnawk hle.

Minute 36-naah goal ropui hmuh a ni a, PC Rosangzuala'n yard 23 vel aṭangin kawh zetin a pet goal a, Police goalkeeper ṭha mi F. Lalmuanawma tan pawh dan theih a ni lo. First half-ah Police-in goal an khung thei lo a, pressure an ngah ta zawk.

Mahse, second half minute 52-naah Dintharin ball a hloh ho deuh a, Malsawmfela leh Lalbiaktluanga te hmangin an nawr nghal a; rawlthar duhawm Tluanga cross fuh tawk lo nia lang chuan keeper J. Lalchhuanliana khumin defender Ricky Zomuanzuala Khiangte tan a lakluh chiah a, Lalbiakhlua'n (Biaktea) chiang zetin a volley lut. Tluanga cross a ṭha thlawt a, box chhungah Biaktea rilru a fim bawk.

Hun tawp thlengin an innawr tawn a, Police substitute KC Larchhuakmawia ball vawrhluh ṭha chu F. Lallawmkima'n goal-ah ṭha zetin tauh mah se keeper Chhuanliana'n a dang. Dinthar pawhin chance an ṭha an insiam a, Jerry Lalchhanchhuaha vanneih zan a ni lo.

First leg khelh dan leh result avangin second leg a hmuhnawm sawt dawn a, chak tur hriatthiam a har. Mizoram Police manager Lalmalsawma Hnamte chuan, "Team pahnih kan khel ṭha ve ve a, ṭawiawmtu kan nei ṭha ve ve a, tualchhung football tan lawmna a ni. MPFC pawh Police mi leh sa, family leh supporter ṭhahnem takin min ṭawiawm a, kan kit sponsor Trustwell chhungkua te kan hmu bawk. Kan hotu sang lam pawhin min phurpui a, kan lawm khawp mai. Kum li chhunga vawi thum final lut thei ngei turin theihtawp kan chhuah ang, " tiin Vanglaini a hrilh a, MPL zawha All India Police Football Championship an khelh tur thu a sawi tel bawk.