Inter Village Futsal kickoff a ni ta

MBOCWWB MFA Inter Village Futsal Tournament 2026 kickoff chu Thawhlehni zan khan Dawrpui Multipurpose Centre-ah neih a ni a, khuallian LESDE deputy director Helen Zochhingpuiii Zote-in khuhhawnna a nei a, fixtures a tlangzarh nghal bawk.

Tun ṭum inelnaah hian team 71 an tel a, October 27, Thawhlehni aṭangin R. Dengṭhuama Indoor Stadium, Mualpuiah khelh ṭan a ni ang. Final hi ruahman dan chuan November 13, Thawhlehni zana khelh tur a ni.

MFA Finance Secretary leh Futsal Committee chairman LV Lalthantluanga (Tato-a) chuan, "India rama futsal inelna sang bera champion lai chu Mizoram club an ni a, Tlangnuam FC te an ni. He inelna best player pawh Tlangnuam FC a khel ni lo mah se Mizo player tho a ni a, Mizote hian futsal hi kan thiam tih a chiang," tiin a sawi.

Tato-a chuan sawi chhunzawmin, "Futsal hian football a tichhia tia sawi pawl an awm a, statistics aṭanga thlir chuan a ti ṭha zawk. Nikuma futsal-a kan san lai ber kha football-ah pawh kan thlen san lai a ni a, India rama football inelna sang ISL leh IFL-ah Mizo an tam bera chhut a ni," tiin a sawi bawk.

2026 SAFF Futsal Championship-ah khan India team player 14 zinga paruk chu Mizo an ni. India ram aiawh hian Lalsangkima, Lalsawmpuia, K Roluahpuia, Lalrinzuala leh Jonathan Lalrawngbawla te an tel a ni.

Tun ṭum Inter Village Futsal-ah hian India international an awm nuk dawn a, Futsal Club Championship champion team-te player bakah Mizoram Premier League player-te an inlan dawn. R. Dengṭhuama Indoor Stadium-a kal hman lo tan pawh BR Studio YouTube channel aṭangin a en theih bawk ang.