Carrick hmaa ding tur Fabregas

Premier League chanchina midfielder hmuhnawm pahnih Michael Carrick leh Cesc Fabregas te an intawng leh dawn a, tun ṭumah erawh khelmual chhungah inbei tawh loin technical area aṭangin thluak hmangin an inbei dawn. Zanin dar 10:15 hian Stadio Giuseppe Sinigaglia-ah Fabregas-a enkawl Como-in Carrick-a kaihhruai Manchester United an mikhual ang.

Como hian season bul an ṭan chhe lo a, Serie A-ah vawi khat chiah chak loh la neiin point 14 an hmu tawh a, pangannaah a awm mek. Italian club hian Champions League an match hnuhnung berah Feyenoord hneh lo mah se an mualah erawh RB Leipzig 4-1 in an sawp. Fabregas-a'n a player neih dan a hrechiang a, Man United hmachhawn dan tur pawh a thiam dawn.

Spanish manager Fabregas chuan, "Team lian hmachhawn dan kan thiam ve hret hret a, keini aiin an ṭha zawk tih kan hria a, kan hmachhawn tho an ngai tih kan hre bawk. Kan rilru put hmang kan tih chak a ṭul a, kan hneh theih a ni tih kan pawm a ngai bawk," tiin club lian hmachhawn tura an inpeih thu a sawi.

Manchester United hi khawvel club ropui ber zinga mi ni mah se tun hnaiah erawh an ropui lo a, Premier League-ah pawh point sarih chauh la hmuin 13-naah an awm mek. Carrick-a hote hian match ruk chhung chak hmel an hmu tawh lo a, Como laka an chak lo a nih phei chuan English manager hi hna chan thei dinhmunah a ding.

Pathianni zan khan Man United hian Leeds United an hmachhawn a, Elland Road-ah Bryan Mbeumo hmangin khung hmasa mah se an goal neih an venghim zo lo. United goal bawh a na tawk lo a, chak châkna an nei tawh lawk lo niin a lang. An result ṭhat tawk loh avangin khelmual pawn boruak thlengin a ṭha lo tel a, an buaina chingfel turin Como hneh a pawimawh dawn.

Man United hian hliam vangin Benjamin Sesko leh Patrick Dorgu te an la chhawr thei dawn lo a, Lisandro Martinez pawh a dam hman a beiseiawm loh. Luke Shaw, Kobbie Mainoo leh Ayden Heaven te an dam hman a nih pawhin bul an ṭan theih a rinawm lo a, Carrick-a tan hna a harsa sawt ang.