Saikhamakawn tan tlanchhuahna ropui?

Mizoram chhunga football inelna sang ber Mizoram Premier League aṭangin Saikhamakawn tla ngei tura ngaih an ni tawh a, nimin tlaiah semifinal lut tawh Dinthar FC hmachhawnin goal an chhuah hmasa zawk. SKK tan beisei tur a awm tawh loa ngaih a nih hnuah coach Lalrindika Hmarin halftime a hmang ṭha a, second half-ah 3-2 a chakin an tho chhuak.

SKK hian Dinthar an hneh avangin table mawngphah chhuahsanin panganaah an awm chho a, mah se an la him lo. Rindika hote hi head to head-ah Ramthar Veng aiin ṭha zawk mah se nizan inkhela MPL kai thar Ramthar Vengin Police laka point an hmuh chuan tla thei dinhmunah an ding leh dawn.

Mahse, vawiin lama inkhel tur MLS FC leh Kanan FC te hian table chunga awm pahnih Chanmari FC leh Aizawl FC te an hmachhawn dawn avangin point hmu belh tawh lo thei dinhmunah an ding. Point an hmu belh tawh lo a nih chuan Saikhamakawn chakna hi thlanchhuahna ropui a tih theih ang a, substitute C. Malsawmdawngkima goal chu hriat reng a ni tawh ang.

Injury time-a Dinthar substitute K. Lalhminghluta (Vala) volley ṭha zet SKK goalkeeper J. Lalchhuanliana dan pawh hriat reng tlak a ni dawn. Tun dinhmuna a lan dan chuan SKK hi him tura ngaih an ni a, mah se football-ah chuan thil danglam a thleng ṭhin.