Kananin Chanmari an chelh

Star Cement MPL13-ah Chanmari FC-in League Winner beiseina chhi nung turin chak mamawh mah se Kanan FC lakah goal an khung thei lo a, table hnuai lama awm club lakah point khat chauh an hlawhchhuah avangin nomawi beiseina a tawp.

RG Stadium-a inkhelah Chanmari FC chungnung hret mah se Kanan pawhin chance an nei tho a, an khelh dan thlirin 0-0 hi result awm tak a ni. Chutihrualin C. Lalmuanpuia'n goal ruakah a khung lo a, Chanmari midfielder hian khung ngat se chuan round 14-ah League Winner tur a hriat chauh ang.

Chanmariin point thum an hlawhchhuah theih loh avangin MPL13 table-a a sang pali inrem dan tur a chiang a, semifinal-a inhmachhawn tur a hriat nghal. League Winner Aizawl FC-in palinaa awm Dinthar FC an hmachhawn ang a, champion lai Chanmari FC leh Mizoram Police FC ten final khel tur an zawng bawk ang.