Relegate tur leh him tur a hriat dawn

Star Cement MPL13 round tawp ber chu vawiin aṭangin khelh a ni dawn. Tlai dar 3:00-ah table mawngphaha awm Saikhamakawn FC leh palinaa awm Dinthar FC te an inkhel dawn a, zan dar 7:00-ah Ramthar Veng leh Mizoram Police FC te an inkhel ang.

Round 14-ah hian table chung lama awm leh hnuai lama awm zel an inkhel dawn a, result tur pawh hriatthiam a har. Dinthar FC tan khelh chhan tur a awm tawh lo a, tun ṭum inkhel hi semifinal tur inpuahchahna a nih theih rualin player lut tlem zawkte luh theihna hun an siam thei bawk.

Saikhamakawn tan erawh MPL-a inhamtang turin chak ngei a ṭul a, point khat chauh an hmu a nih chuan an relegate dawn. Chutihrualin coach Lalrindika Hmar hote hian Maimawms hi round 3 khan 3-0 in an hneh tawh a, vawiin tlai hian hneh nawn an tum ang.

MPL kai thar Ramthar Vengin talbuai lai an neih avangin table mawngphahah te an awm hman a, mah se coach Lalnunmawia hote hian match hnuhnung pahnihah a elpui Kanan FC leh MLS te an hneh avangin panganaah an awm mek. Ramthar Veng hian Police hi hneh lo pawh ni se, midang result a zirin an la him thei bawk.

Chutihrualin Ramthar Veng tan MPL khel zel turin inkhel dang result-a innghah a rem lo a, Police lakah siruk lain an thawk chhuak ang. Police erawhin season ṭha tak an hmang a, semifinal khel turin ruahmanna an siam chho ṭan thei ang.