MLS nge relegate dawn Ramthar Veng?

Star Cement MPL13-ah vawiin tlai dar 3:00 hian Lawngtlai club MLS FC leh table mawngphaha awm Ramthar Veng FC te an inhmachhawn dawn. Club pahnih hi tla thei dinhmunah an ding ve ve a, vawiin tlai inkhel result hian an hmalam hun tur a hril ang.

MPL-ah hian table hnuai bera awm hi an relegate nghal a, pasarihnaa awm hian MPL Qualifier-a pahnihna nen playoff hmangin MPL khel tur an zawng ṭhin. Hei vang hian MPL-a pasarihna hi chu an him tlangpui a, chutihrualin MPL khel zel tur tan parukna china awm mai a him.

MLS hian point 11 an hmu a, paruknaah awm mah se pariatnaa awm Ramthar Veng nen an inkarah point khat chauh a awm. Ramthar Vengin an match hnuhnung berah Kanan FC an hneh avangin beiseina thar an nei a, MS Dawngliana a rawn kir leh tawh bawk avangin an tawh a khirh sawt dawn.

Lawngtlai club erawhin season zawna semifinal khelh theihna hun ṭha an bawhpelh a, coach F. Lalrozama hote hian match hnuhnung bera Dinthar FC an hneh loh avangin semifinal kawng a ping. Team pahnih hi August thla tawp khan an inhmachhawn a, goal awm loin an inhnehtawk a, tun ṭumah pawh hian chak tur zawk hriam thiam a har hle.