Zaninah Kanan FC vs Chanmari FC

Star Cement MPL13-ah zanin dar 7:00 hian Chanmari FC leh Kanan FC te RG Stadium-ah an inkhel dawn. Chanmari tan League Winner ni turin chak ngei a ṭul a, Kanan tan relegate lo turin point hmuh ngei a ṭul bawk.

Chanmari hian Kanan FC hi an intawn hmasak ṭumin 5-1 in an sawp a, thla khat chuang hnuah team pahnih hian hma an sawn ve ve. Season chanve aia rei table mawngphaha an awm hnuah Kanan FC an tho chhuak a, team tum châkawm lo ber zinga mi an ni tawh.

Kanan forward Malsawmzela'n (Valpuia) goal nga a khung tawh a, a khelh dan thlirin Mizoram Santosh Trophy team probables a tel ngei a phu hle. Mizoram senior team tana feh chhuak tawh Vanlaldinpuia hming lam hmaih a thiang lo a, ball a thiam bakah a tlan chak avangin Chanmari tlarhnung tan buaina a ni thei ang.

Chanmari FC-in Steven Dias awm hnuah striker pahnih an hmang a, goal pawh an khung tam sawt. Mizo striker chhuak thar ṭha pathum Lalruatsanga (7 goals), Lalthanzuala (5) leh Suanngaihmuana (5) te hi Kanan tlarhnung tan ven tham an ni ang.

MPL champion lai hian round 6-a Aizawl FC nen an inhnehtawk hnuah an khingpui an hneh vek tawh a, an result a ṭhat chhoh chhanah transfer tawp dawn hnaia an lakluh Lalliansanga leh R. Ramdinthara (Tharpuia) te an pawimawh viau bawk. Chanmari hi chak tura ngaih an ni a, an chak lo a nih erawh chuan League Winner beiseina a tawp nghal ang.