College futsal thiam ber Hrangbana College

Govt Hrangbana College-in football leh futsal khelh thiam player an ngah a, Made by Mizo Mizo Inter College Futsal Tournament 2026 an thunun. Thawhṭanni zan khan HBC hian final-ah Govt T. Romana College chu 8-4 in an sawp a, an champion.

R. Dengṭhuama Indoor Stadium-a inkhelah Mohammedan SC winger Lalthankima'n (Thathana) goal nga ngawt a khung a; Lalsawmpuia, Lalrinhlua leh K. Hmingthanzuala ten goal khat ṭheuh an khung ve bawk. TRC tan Royal Moses-a'n goal hnih khungin Malsawmtluanga leh Jones Lalṭhakima ten goal khat ve ve a khung.

Final-a che ṭha Ainawn tlangval Thathana chu best player-a thlan a ni a, HBC hian player ṭha an kawl tam hrim hrim. Shillong Lajong leh Mohammedan tana khel tawh Zodingliana Ralte-in (Adinga) a ho a, futsal khel thiam bik Sawmpuia, Lalremruata (Gnie) leh Lalrinzuala te an awm a, squad chah ber leh champion phu berin nomawi an chawi a ni.