Carlos Baleba a inpeih tawh em?

Manchester United-in zanin dar 10:00 hian anmahni ang bawka Premier League-a talbuai Tottenham Hotspur an mikhual dawn a, United manager Michael Carrick leh Spurs manager Roberto De Zerbi hriltu a ni thei ang.

Carrick-a hote hian match nga aṭangin point nga chauh an la hmu a, table-ah 12-naah an awm. De Zerbi hote hian point hnih chiah an la hmu a, table-ah a mawngphahah an awm mek. October thla a nih chhoh tawh avangin manager banna chance a awm chho ṭan a, inkhel tur pawh hi 'El Sackico' tih hminglem an pe hial.

Club pahnih pressure tih kian nan international break a rawn tla zep a, mah se pressure a nep phah lo a, hun pawhseina chauh niin a lang. Chutihrualin kar hnih chawlh chhungin Man United-in nipui bazara £70mtd senga an lakluh Carlos Baleba a dam ṭha hman a, training a zawm ṭha vek tawh.

International break hmaa Man Untied leh Fulham te 1-1 a an inhnehtawk khan Baleba hi bench-ah a awm tawh a, Spurs lakah khelhna hmun a hmuh ngei a beiseiawm. Carrick-a hote hian league-ah goal riat an chhuah tawh a, clean sheet an la nei lo. Midfield-ah Bruno Fernandes zalen taka a khelh theih nan Baleba mamawhna a nasa a, mah se kum 22 mi Cameroonian midfielder tan Old Trafford pressure hi a hautak viau thei bawk.

Man United-in nipui bazara sum an thehchhuah tam tawk loh laiin Spurs erawhin £334mtd an seng pha a, chung zingah chuan United nen pawha sawi zawm £100mtd man Sandro Tonali a tel. London club hian sum seng tam mah se tun season league-ah chak an la nei lo a, match hnuhnung bera Aston Villa 3-2 a an hneh loh ṭumin hun tawp dawnah goal an khung ve chauh bawk.