Commonwealth Cue Sports C'ship-ah Lalrina Renthlei

Commonwealth Cue Sports Championships-ah India aiawhin Lalrina Renthlei a tel. Tuikhuatlang pa Lalrina hi Mizo basketball player ṭha ber zinga mi niin India aiawha tel pha a ni a, basketball bakah 'cue sports'-ah pawh India aiawhin a tel pha. Inelna hi nimin khan Veer Savarkar Sports Complex, Ahmedabad-ah khelh ṭan a ni.

Commonwealth Cue Sports Championships ah hian ram 40 chuang aṭangin mipa leh hmeichhia player 144 inlan tura beisei an ni a, game discipline 5: Snooker, Billiards, Blackball, Heyball leh 10 Ball Pool ah te inelna neih a ni ang. Mizo player ṭha Lalrina Renthlei hian 10 Ball Pool event-ah India ai awh ang.

Mizoram Snooker & Billiards Association chuan thuchhuah siamin Lalrina Renthlei an chhuan thu leh an lawmpui thu an sawi a, duhsakna an hlan tel bawk. Lalrina bakah hian BSFI Vice President leh MSBA Sr. Vice President ni lai Vanlalnghaka pawhin Cue Sport inkhawmpuiah hi a chhim a ni.

Inelna hi October 8 - 10, 2026 chhunga khelh tur a ni a, Billiards & Snooker Federation of India in a thleng a, Apex Sports Promotion-in an buaipui thung a, Commonwealth Sport leh World Confederation of Billiards Sports (WCBS) hriatpuina leh pawmpuina hnuaia khelh a ni bawk.