Uruguay-in India lakah goal surtir
Brazil laka 4-0 a an tlawm hnuah India an tlawm leh ta a, Thawhlehni zan khan mikhual Uruguay chu 6-1 in an ngam lo - Blue Tigers hian tun international break-ah World Cup 2026-a inlan ram pathum an hmachhawn a, chak an nei lo.
India hian match hmasa berah Panama chu 1-1 in an draw a, Brazil laka an tlawm hnuah Uruguay an ngam lo leh ta - Blue Tigers hian match thum aṭangin goal 11 an chhuah a, goal hnih an khung thung.
Hetih rual hian India tan an team hmachhawnte an sang hret tih phat rual a ni lo a, an ṭha mah mah! A lawmawm lai erawh Uruguay lakah goal an khung ve a, Anirudh Thapa chuan goal khat a khung.
Uruguay tan Maximiliano Araújo chuan goal hnih khungin, Darwin Núñez, Rodrigo Zalazar, Juan Manuel Sanabria leh Rodrigo Aguirre ten goal khat ṭheuh an khung bawk a, an chak chiang.
A hot lo!
AIFF-in tun international break-ah an beisei aia ṭha Indian football fan-te pek an tum a, sum tam tak sengin Brazil leh Uruguay an chah chhuak. Mahse, an beisei ang erawhin a hlawhtling lo.
Brazil nena an inkhelah stadium khat tlata fans pungkhawm tura beisei a nih laiin, mipui 85,000 lenna stadium-ah mipui 51,000 an pungkhawm a, ticket 16,000 chiah hralh niin, a bak zawng sem a ni!
Uruguay nena inkhel turah pawh beisei angin ticket hralh a ni lo a, a tira Rs. 1999-a an zawrh chu Rs. 199-in an hralh a, West Bengal sorkarin ticket 22,000 a sem bakah, East Bengal leh Mohun Bagan ten an sem bawk.
Hetichung hian Salt Lake Stadium-a India leh Uruguay inkhelah fans 37,307 bak an pungkhawm lo a, inkhel ṭantir lamah phei chuan fans pungkhawm zat hi 15,000 vel chauh niin an sawi!
Mizo telna
Khalid Jamil-a'n Brazil laka bul ṭan lo Edmund Lalrindika chu Uruguay lakah bul a ṭantir a, Mizo forward hian goal khungna remchang nei mah se, Lunglei tlangval chance neih hi Villarreal defender Santiago Mouriño chuan a lo dang hman.
Thapa goal khung hi Ryan Williams-a shot per aṭanga ball kal a ni a, Edmund-a pet hmain Thapa-a'n a pet a, a goal - Bagan midfielder goal khung hi Darwin Nunez-a goal khung sutna a ni a, he goal hian Uruguay a chhaih kawlh ni berin a lang!
India hian a tir lamah an tithei viau a, mahse, hydration break hman a nih hnuah ngai an awh leh tawh lo - ṭek tla avangin minute 30 vel inkhel hi chawlh lailawk a ni a, India an tho leh tawh lo.
Uruguay-in goal nga an khung zui a, India an tlawm. Lalengmawia Raltein goal khungna chance a neih a chhawr lo a, minute 65-naa Hmingthanmawia Ralte (Valpuia) luhtir a nihin India-in goal li an chhuah tawh a, a harsa tawh.