Remsiami hian Pathian a ṭih - Coach Btei

Asian Games-a India-in gold an lak theihna tura final-a goal awmchhun khungtu Lalremsiami Hmarzote-in tun dinhmun a thlen nan hian mi pawimawh ṭhahnem tak an awm a, chung zinga mi SYS coach Lalroṭhuami'n (Btei) Remsiami'n Pathian a ṭih thu Vanglaini a hrilh.

SYS coach Btei chuan, "Mizote chuan Pathian kan ṭih vek a, mah se Remsiami hi chuan a ring bik a ni. A ṭawngṭai tam a, a nunah a lang bawk. Final khelh hma pawh khan kan inbia a, chutah pawh chuan ṭawngṭai sak turin a rawn ngen a ni," tiin Vanglaini a hrilh.

India ram hmeichhe hockey-a Mizoram an lan ve theih nana hma latu zinga mi Btei hian Remsiami leh Lalthantluangi te hi an naupan lai aṭangin a hre ṭha ve ve a, a enkawl leh zirtir ve ve niin an chanchinah entawn tur a tam thu a sawi. Btei chuan, "Tluangi hi ka hmuh hmasak ber khan, midang aiin a thiam bik chuang lo. Mahse, ani hi chu a chak ṭha a, a tumruh bawk. A chak ṭhat avangin drag-flicker tur pawhin kan zirtir nasa a, Pathian zarah India hmachhuan ber a nih hi kan ring tlat a ni," tiin a sawi a, Remsiami erawh a chak ve lo a, tun dinhmun thleng tura a thawhrim thu a sawi tel bawk.

Btei chuan sawi chhunzawmin, "Infiammi dang ang bawkin Tluangi pawh hian beidawn rum rum chang hi a nei ṭhin a, a chhungten hnathawk tur an duh avangin SAI extension Center Thenzawl aṭanga lakchhuah duh hun laite an nei ṭhin. Mahse, hetiang hunah pawh hian amah chauh ni loin a chhungte hian coach-te thu hi an zawm thiam em em a ni," tiin a fak hle.

Mizo hmeichhe hockey coach Btei chuan tun ṭuma hlawhtlinna hi hockey tan chauh ni loin Mizoram infiamna tan a nih thu a sawi a, Mizo mipuite Mizoram tihmingṭhatute hmuak tura thawk chhuak ṭheuh turin a sawm bawk.