MLS tan Felix-a a inlar

Star Cement MPL13-ah MLS FC-in nimin tlai khan hun tawp dawna Felix goal hmangin Saikhamakawn 2-2 in an chelh a, table-ah panganaah an awm chhunzawm. SKK hian point thum hlawh chhuak se, panganaah an awm thei a, point khat chauh an hmuh avangin Lawngtlai club hnuaiah bawk an awm.

RG Stadium-a inkhelah Saikhamakawnin ṭum hnih ngawt hma an hruai a, minute 25-naah LH Chawimawia'n hmahruaina goal a khung. Midfielder fing K. Lalremmuana ball vawrh chu Chawimawia'n vawi khatnaah tauh lut thei lo mah se keeper tih per chu goal-ah a chantir ta tho.

Lawngtlai club-in injury time-ah siphurh an sut a, dinglam aṭanga cross ball chu Felix-a'n keeper a tauh khalh. SKK player Vanlalthanga'n a pet chhuah theih avangin MLS captain Lalbiakzuala'n goal line aṭangin a pet goal.

Ruahsur leh chhum zin vangin second half a mumal tawk lo a, minute 53-naah Rorelliana hmangin SKK-in hma an hruai nawn. Lalrindika Hmar hote tan chakpui theihna tur goal ni mah se injury time-ah bawk goal an chhuah.

MLS midfielder K. Lalhmangaihkima'n freekick ṭha zeta petin box chhungah Felix-a'n lo khawih zeuhin SKK keeper tan dan hman ngaihna a awm ta lo. Goal dang luh belhna hun a awm tawh lo a, 1-1 in an inhnehtawk.