South Korea hnehin India-in final an lut

Asian Games hmeichhe hockey-ah Lalremsiami leh Lalthantluangi te telna India hmeichhe team chuan nimin tlai khan semifinal-ah South Korea 2-0 in an hneh a, final an lut.

India hian final-ah Japan hnehtu China an hmachhawn dawn a, October 2, Zirtawpni tlai dar 3:30 hian gold medal an inchuh dawn. China hian semifinal-ah inelna thlengtu Japan nen hun pangngaiah goal awm loin an inhnehtawk a, penalty shootout-ah 4-2 in an vannei ta zawk.

Gifu Prefectural Green Stadium-ah China-in final an luh zawhah India leh South Korea te an inkhel chhunzawm nghal a, semifinal hmasa zawk ang thoin goal a lut lawk lo. India-in first half-ah inkhel thunun mah se goal hmuh tur a awm lo a, vanduai thei dinhmunah an ding.

Mahse, third quarter-ah Haryana forward Ishika-i'n minute 44-naah a khung a, minute li hnuah captain Salima Tete-i'n (Jharkhand) a khung lehnghal bawk. Mizo nula pahnih telna India team-in harsatna lutuk tawk loin 2-0 in an chak.

South Korea lakah India tlarhnung a phui ṭha a, tlarhma lam goal bawh pawh a na viau. Chutihrualin Korean nulaten tlarhnung an ti phui ṭha a, an goalkeeper a chet ṭhat bawk avangin India-in goal hnih chauh an khung.

India hmeichhe team hian kum 1982 hnuah Asian Games-ah gold an la leh tawh lo. Chutihrualin kum 2002 leh 2018 te khan silver an la a; kum 1986, 2014 leh 2023-ah te khan bronze lain kuminah gold lak ngei an tum hle.

Tun ṭum inelnaah hian Deepika Sehrawat-i'n goal 21 khung tawhin inelna pumpuiah a la khung tam ber a, Navneet Kaur-i'n goal 10 khungin a dawt. Mizo nula Lalremsiami leh semifinal-a goal khungtu Ishika ten goal ruk ve ve an khung tawh bawk.

India squad

Goalkeepers: Savita, Bichu Devi Kharibam

Defenders: Ishika Chaudhary, Sushila Chanu Pukhrambam, Lalthantluangi, Jyoti, Shilpi Dabas

Midfielders: Nikki Pradhan, Sakshi Rana, Sunelita Toppo, Salima Tete (C), Neha, Deepika Soreng

Forwards: Lalremsiami, Rutuja Dadaso Pisal, Navneet Kaur, Deepika, Ishika, Baljeet Kaur, Beauty Dungdung