Dintharin Ramthar Veng an hneh nawn

Star Cement MPL12-ah Ramthar Vengin insiam ṭhat tumin coach atan Lalnunmawia hmang mah se Dinthar FC laka an result erawh a danglam lo. Maimawms-in Durtlang Football Stadium-a 1-0 a an hneh tawh Ramthar Veng chu, RG Stadium-ah pawh 1-0 thoin an hneh nawn.

Nimin inkhel a nung ṭha a, ṭan phat aṭangin chance an inneih chhawk a ni ber. Ramthar Veng tan J. Lalbiakliana a nung ṭha a, mah se Dinthar keeper J. Lalchhuanliana a paltlang thei tlat lo. Rmathar Veng keeper John Lalruatfela pawhin a hna a thawk ṭha a, penalty erawh a dang thei bik lo.

Dinthar forward PC Rosangzuala'n Ramthar Veng defender Abraham Lalngaihsaka ban a pet per a, PC-a hian penalty hi pet nghalin minute 43-naah goal awmchhun a khung. Second half-ah pawh goal chance a la tam a, Ramthar Vengin crossbar hial pet per mah se goal an khung thei lo. Dinthar 1-0 in an chak.