Semifinal khel tur zawnna nge relegation battle? Tlai dar 3:00-ah MLS vs Saikhamakawn FC

Star Cement MPL13-ah vawiin tlai dar 3:00 hian Lawngtlai club MLS FC leh Saikhamakawn FC te an inkhel dawn. RG Stadium, Mualpuia inkhel tur hi semifinal khel tur zawnna a nih theih rualin relegation battle tiin a sawi theih bawk.

SKK coach Lalrindika Hmarin result ṭha an neih loh avangin banna a thehlut hial a, mah se club lamin an chelh a, match hnuhnung berah Ramthar Veng 2-0 in an hneh. Point thum hlu tak an hlawhchhuah avangin SKK hian an chung chiaha awm MLS hi point khat chiahin an pha tawh lo.

Lawngtlai club erawhin match hnuhnung berah Mizoram Police an hneh loh avangin palina aṭangin an tla thla thung. Vawiin inkhel tur hi team pahnih tan a pawimawh a, intluk tawk leh intiat tawka ngaih an nih avangin a hmuhnawm dawn.

Durtlang Football Stadium-ah September 11, 2026 khan club pahnih hi an inhmachhawn tawh a, MLS 3-2 in an chak. Hun tawp thlengin inkhel a hmuhnawm hle. Round 6-a an inhmachhawn ṭum hian MLS-in Steve Jorge Laltlanchhuaka hmangin first half-ah goal hnih an khung.

SKK lamin John Lalrinawma hmanga siphurh an sut ṭhen hnuah LH Lalchawimawia hmangin minute 79-naah siphurh an sut zo. Rindika hote dinhmun a ṭha tawh zawk tura ngaih ni mah se hun tawp dawn hnaihah keeper Lalhruaitluanga Kawlni (Bawihpuia) a inhliam a, SKK-in substitution vawi thum an siam hman tawh.

Bawihpuia thlak turin bench aṭangin keeper an luhtir thei tawh lo a, defender Samuel H. Lalhlimpuia'n goal ven hna a thawk. Injury time-ah substitute Falton Beirachakhei a rawn inlar a, hun pek belh minute nganaah chakna goal rawn khungin SKK tan sutna hun a awm tawh lo.

Vawiinah player 11 ve vein an khel dawn a, F. Lalrozama kaihhruai MLS-in chak tumin khelmual an lut dawn a, SKK pawhin point thum hlawhchhuah an tum dawn. Lawngtlai club-in Lalfamkima (FK-a), Felix Lalruatsanga leh Falton N. Beirachakhei te an kawl a, SKK lamin Rorelliana leh Lalrothlanga te an kawl thung. RG Stadium-ah goal hmuh tur a awm dawn.